三人五目，日後無長短腳話（劇本）
新竹國小 盧玟伶
第一幕：做媒人
人物：媒人婆仔、獨眼ｅ小姐、獨眼小姐ｅ阿爸（老爺）gah阿母（夫人）
地點：獨眼小姐in兜ｅ客廳
啟幕ｅ時，老爺gah夫人坐di客廳lim〔喝〕茶，媒人婆仔按外口入來，na行，手na拽伊ｅ手巾仔。
媒人婆仔：老爺、夫人lin找我有什麼代誌？
老爺：媒人婆仔，阮知影你是庄仔頭上ghau做媒人ｅ，今仔日想bheh請你ga阮查某囝找一個親成。
媒人婆仔：這無問題啦!若別項咱就mai講；若做媒人，你找我就對a。M是我le臭彈，講著做媒人，咱庄仔內是無人due我會對，看你bheh找什麼款ｅ親成，作你講，包你滿意。(手長心肝頭掛保證)
老爺：（表情真歡喜）若按呢，我先ga你說多謝。
媒人婆仔：m知老爺想bheh找什麼款ｅ囝婿？
老爺：會疼某閣顧家ｅ少年家，我上甲意，厝內散赤無要緊。
媒人婆仔：這無問題。是講… …（媒人婆仔講話吞吞吐吐），m知敢會使看小姐一下。
老爺：查某囝in阿娘，去ga咱查某囝叫出來。
媒人婆仔：（di小姐ｅ身邊看前看後）老爺，做你放心，安啦！。相親hit一工，會記zit ga小姐準備一支葵扇，叫小姐ga hit蕊〔lui〕無看ｅ目睭zah 〔遮住〕leh，m通bhe 記o！
第二幕：相親
人物：媒人婆仔、獨眼小姐、跛腳少爺。
地點：媒人婆仔in 兜。
起幕ｅ時，跛腳少爺徛di樓梯邊，一隻腳kue di樓梯。獨眼小姐ui房間行出來，手舉一支葵扇，葵扇ga hit蕊〔lui〕無看ｅ目睭zah〔遮住〕 le。
媒人婆仔：（行ui小姐hia去）小姐，zit位就是我ga你講過hit個緣投、漂撇閣大範ｅ少爺，少爺m定家世好、學問guan〔高〕，人品更加無話講、真正是一粒一ｅ人才。
（獨眼小姐愈聽愈歹勢，頭愈ann愈低〔愈壓愈低〕。）
媒人婆仔：（行對少爺hia去）少爺，zit位就是我ga你介紹hit個妖嬌閣迷人ｅ小姐。小姐ｅ個性溫柔、賢淑，得人疼。你拍燈仔火ma找無第二個，你若娶著伊，絕對是人人欣羨、人人呵咾ｅ。
媒人婆仔：少爺，m知你ｅ意思啥款？
少爺：（媒人婆仔愈講，少爺愈甲意。）好！真好！真好!有啦！有啦!我有甲意！我有甲意啦！
媒人婆仔：a！小姐，你le！
小姐：（小姐歹勢gah面仔紅gi-gi，一粒頭ann gah低低低，ham看少爺ma m敢看。）（細聲ga媒人婆仔講）我有甲意啦！
媒人婆仔：既然lin攏有甲意對方，若按呢我就當lin二人ｅ面ga話講ho清楚，zit zan〔這件〕婚事是lin二人歡喜甘願ｅ。今仔日，你我三人五目，日後是bhe使有長短腳話o！
第三幕：理論
人物：媒人婆仔、獨眼小姐、跛腳少爺。
地點：媒人婆仔in 兜。
背景：成親了後，小姐發覺少爺跛腳，少爺發現小姐獨眼，二人相招去找媒人婆仔理論。
起幕ｅ時，媒人婆仔坐di客廳舉葵扇拽風，少爺gah小姐氣put-put ui外口行入來。媒人婆仔看in按呢，趕緊kia〔站〕起來。
少爺：（氣put-put）媒人婆仔，nai按呢！你m是講小姐外好du外好，nai〔怎會〕是獨眼ｅ！
小姐：（氣put-put）就是啊！你m是講少爺外緣投、外漂撇，nai〔怎會〕是一個跛腳ｅ。
媒人婆仔：少爺、小姐，lin ma mai受氣，我a無ga lin騙a。當初時，我dor ga lin講過a，「你我三人五目，日後bhe使有長短腳話」。
媒人婆仔：少爺，你想看mai，咱三個人應該有六蕊目睭，但是我是講『你我三人五目』，當然dor是leh講咱其中有一個人是獨眼ｅ。而且，小姐除了獨眼以外，敢m是真賢慧、人人呵咾？你看人伊ｅ身材是葫蘆腰，皮膚ma是白pau-pau、幼綿綿lo！外sui你敢知！
少爺：（若啞gau〔啞巴〕有話講bhe出嘴。）（di-di-du-du nai〔支支吾吾〕）是啊！
媒人婆仔：iah閣有，小姐，我ma有講過「日後無長短腳話」，這明明dor是leh ga你講，你有一雙好腳，我ma有一雙好腳，若按呢當然有一個人是長短腳lo！而且，少爺除了跛腳以外，甘m是體貼、顧家閣真疼你？你看人伊ｅ面生做一表人才，鼻dor是鼻、嘴dor是嘴，講話嘴會振動、目睭ma會看人，外靈敏你敢知！
小姐：（目睭大大蕊，掠媒人婆仔憨憨看，越頭閣看少爺）有啦！有影啦！
媒人婆仔：相親ｅ時，我就講「你我三人五目，日後無長短腳話。」lin hit陣攏無意見，zit mai奈會使後悔！
（少爺gah小姐二人目睭相對相，na看suah na愛笑。想想ｅ，媒人婆仔講ｅ話ma是有理。二人ga媒人婆仔說〔se〕多謝，歡歡喜喜牽手相cua轉去。）
謝幕。
問題討論：
1.你若是hit個跛腳ｅ少爺、iah是獨眼ｅ小姐，你會安怎？
2.媒人婆仔講ｅ話，你感覺敢有道理？
3.換你講你想bheh討論ｅ問題，ho大家來討論。
-----
more
Original Post on Pixnet