《數學家ｅ故事》自序﹨劉信輝
會記三冬前，di台南ｅ南鯤鯓台語文學營內底（我是hiaｅ工作人員），第一擺gah張春凰老師ham yin翁婿江永進老師di hia見面。Hit當陣ｅ我，經過別人ｅ介紹，我ziah知影老師di清華大學leh教冊，而且gorh是教台語文，ho當時ｅ我感覺真新en趣味，決定後一學期veh去修老師所開ｅ課，zit個選擇，除了帶ho我台語文ｅ訓練，ma會使講是zit本冊ｅ源頭。
自細漢，我就di教會內底大漢，教會羅馬字我加減a看有，mgor，我並ve曉寫，ma m知台語是一種足suiｅ語言，這一切攏愛感謝張老師ham我ｅ高中老師—王宗傑老師ｅ引cua教示，我ziah有法度寫出一寡仔台語文章，ma kah了解語言之間是需要尊重ham欣賞。
數學對我來講，是我家已ｅ選擇，因為我甲意dang頭殼內想數學，di hia得著屬於我ｅ成就感，所以讀數學是一種快樂ｅ活動，ma是一種享受。Dor按呢，高中畢業以後，我選擇清華數學系做我ｅ第一志願。
數學ｅ歷史，對數學家來講，是重要ｅ物件，因為伊是一款思想史，代表著人類思想ｅ進步，ma代表著人類思考方式ｅ轉變。另外一方面，數學ｅ發展，定定ma對其他領域產生足大ｅ影響，因此，數學ｅ歷史，對人類來講，有另外ｅ意義。Di zit本冊內底，我主要是寫卡早ｅ數學家，yin做數學ｅ一寡成就ham一寡小故事，gorh卡重要ｅ是，數學家奮鬥ｅ過程ham yin值得咱學習ｅ骨氣，我攏盡量寫di zit本故事集中。
Zit本冊ｅ誕生，愛ui我大學二年講起。當時ｅ我，di修張老師ｅ課以後，老師希望我edang寫一寡數學家ｅ小故事，di hit當年ｅ暑假，我無閒了數學營隊以後，我就開始寫故事。一開始，我m知如何編排，m知如何寫一個人ｅ事蹟故事，我diorh隨我cue著ｅ資料，按照我家已對傳記ｅ印象開始寫。因為開始寫ｅ速度足慢，di hit個暑假，我ganna寫出十篇，交ho老師修改，老師當然是改gah足艱苦，因為足濟所在攏無一定ｅ格式，ma真濟用詞錯誤ah是無順，會有zit本冊，張老師ｅ指導gah修改真正愛好好感謝。
接落來，我用我零星ｅ時間繼續寫，總算是寫出zit寡物件，ma edang講是我拖沙出一寡成就lo。我感覺寫zit本冊ｅ過程中，有足濟無仝款ｅ感受，一開始是感覺真遙遠，m知愛外久kah寫會了，有ｅ時陣更加感覺會煩，無想veh寫，所以我拖了真長ｅ一段時間，ga老師加添足濟麻煩，di zia向老師道歉，ma感謝老師ho我ziah-nih濟ｅ時間等我daudau做。我想，若是無老師di後壁若sak若幫忙，我想zit本冊應該是無可能有結果。
另外，ma愛感謝江老師ｅ台音輸入法，ho我di leh寫故事ｅ過程中，得著真濟好處。像講台語ｅ一寡用詞，我真正m知veh如何寫，但是只要我有法度寫出拼音，台音輸入法就會有字，這對台語ｅ寫作真正是一種便利。
現在，有一點仔故事集，未來若是有機會，我會繼續整理其他數學家ｅ故事，簡單講，diorh是續集。
（2006.6.25）
more
Original Post on Pixnet