Holmes回憶錄：祖厝ｅ禮典(The Musgrave Ritual)
by Conan Doyle；台譯：李威寬、張春凰、游政榮
我定定感覺我ｅ朋友Sherlock Holmesｅ思考方法精確有條理，伊身軀頂ｅ衫仔褲樸素gorh整齊，但是伊ｅ生活習慣卻是真散仙，ho gah伊住做伙ｅ人感覺心煩。我家己di zit方面gah伊無仝。我以前di Afghanistan［阿富汗］做兵，染著hit爿人民ve愛計較ｅ性情，ho我變gah足cin-cai，m是一個醫生應當有ｅ嚴格。但是對我來講總是有限度。親像伊ga薰kng di薰吹內，薰吹kng di Persian［波斯］cen拖仔裡，a一寡伊ｅ朋友寄來iau未答覆ｅ信件卻ho伊用一支大大ｅau折刀，插di木製壁爐台正中央ｅ時陣，我diorh開始感覺家己ia gorh比伊kah規矩。另外，我認為逐gai手槍練習是一種戶外消遣，a Holmes興趣若iann起來，diorh坐di伊ｅ扶手椅頭仔內，對壁烏白開槍，試伊ｅ槍法，所以he壁頂有真濟槍籽空，伊感覺按呢真趣味。
阮ｅ房間kng真濟化學藥品，比如講牛奶杯裡定定裝著伊ｅ化學藥品。另外，桌頂gah厝角攏堆滿伊kah早ｅ批ham伊探案時ｅ證物。Zit堆物件攏對伊真珍貴，suah完全無分類kng ho好。伊每一冬只有一兩gai集中精力去歸納處理yin。因為逐gai伊辦案了後，攏已經過度疲勞，必須歇睏。Di zit個期間，伊定定用伊甲意ｅ音樂ham冊本來消除伊ｅ疲勞，除了ui膨椅到桌邊以外攏ve sua動。按呢一個月gorh一個月，伊ｅ文件愈積愈厚，厝裡每一個角落攏堆著一捆一捆ｅ手稿，diorh差不多veh gah人平guan，mgorh伊m-na m肯燒掉，而且除了伊本人以外，誰ma不准ga yin sua動一腳步。
有一個冬天ｅ暗時，阮做伙坐di壁灶邊，互相開講，ma真趣味。我diorh趁zit時陣向伊提出，請伊ga堆積親像山ｅ批ham冊整理ho好，按呢厝裡會kah闊淡薄仔。伊聽著我ｅ話，感覺真對，突然間ma無法度拒絕，伊淡薄仔受氣行入伊ｅ房間，轉來ｅ時陣身後拖著一ka鐵皮大箱仔。伊ga箱仔kng di地板中央，diorh gu落去，拍開zit個箱仔蓋。我看箱仔內滿滿攏貼著文件，攏用紅帶仔捆做一捆一捆。
伊用失意ｅ目睭ga我相，講：「Watson，zit個箱仔內有真濟案件。我想若是你知影我內底全部ｅ案件，按呢你diorh會愛我ga裝入去ｅ檔案攏總teh出來leh。」
我問講：「按呢講，這攏是你早期辦案ｅ記載lo？我早早diorh想veh請你ga kah早ｅ偵探寫入我ｅ紀錄裡leh。」
「是a，我ｅ朋友，這攏是di我iah未出名以前辦ｅ案件。」伊講，慎重teh出一捆一捆ｅ文件。然後伊gorh講：「Watson，zia-e攏m是成功ｅ紀錄，因為我hit當時經驗gorh淺，mgorh其中ma有真濟真趣味ｅ案件。親像Tarleton〔托爾登〕兇殺案報告，Vamberry〔范貝里〕酒商案，Russian〔俄羅斯〕o-vah-sangｅ冒險案，gorh有鋁造手枴奇案ham bai腳ｅRicoletti〔裏寇里特〕gah伊可惡牽手ｅ案件。Iah有一件，這是一件非常奇怪ｅ案件。」
伊ga手伸入箱仔內，ui箱仔底teh出一個小木盒仔，diorh親像qin-a cit-tor物仔ｅ盒仔。伊ｅ盒仔蓋edang活動，內底藏著一張riau-riauｅ紙，一個舊式銅鎖匙，一支纏著線球ｅ木釘，gorh有三個生sen、圓箍型ｅ舊金幣。
Holmes笑笑ga我相，講：「朋友，你看zit個物件會想著啥？」「Zia足濟奇奇怪怪ｅ物件，一定是一件奇怪ｅ代誌。」「無錯，假使你知影zin件代誌ｅ真相，一定會驚一dior。」 「按呢，這內底gorh掩kam一段歷史嗎？」「確實掩kam一段歷史，而且原因gorh足複雜。」「He到底是什麼案件leh？」
Holmes無講話，ganna ga盒仔中逐項物品攏teh出來，kng di桌頂。伊gorh轉身坐落來，足驕傲deh相著zia-e物件。
過一段時間，伊ziah講：「我看著zit個物件gorh想起Musgrave典禮中ｅ怪事lo。」
我聽過zit個奇怪案件ｅ名，已經m-na一gai，但是伊講gah足無清楚，所以我gorh m知zit個案件ｅ真相。
我講：「若是你願意ga zit項奇案講ho我聽，我一定足歡喜來注意聽。」
Holmes歡喜gah大叫。「Watson，我真歡喜ga zit個案件ｅ案情講ho你聽。Mgorh按呢diorh無工夫整理文件lo。你ｍ是嫌厝裡亂糟糟嗎？Zit件案ｅ情節，ham普通ｅ案件完全無仝，所以我有自信di全國ia是其他ｅ國家ｅ任何罪案，攏ve比zit件案gorh kah奇怪a。若是收集我ｅ各種案件，suah ga zit案漏gau去，按呢記載diorh ve-sai算做完全lo。」
「你應該gorh會記『扣船案』ｅ代誌，我gah hit個不幸ｅ人交談了後，我ziah決定以偵探做為我一世人ｅ職業。你看我zitma已經名聲tang四海a，警方ham公眾人物攏ga我當做疑難案件上gai guanｅ上訴法院。Di你gah我第一gai見面，咱做伙偵探『血字ｅ研究』hit案ｅ時陣，我已經di社會上有淡薄仔ｅ虛名lo。我ｅ工作du開始ｅ時陣，ma經過足濟困難，ma食過真濟你真歹想像ｅ苦，後來ziah di偵探界慢慢有家己ｅ名聲。」
「當初我du-du來到倫敦，住di大英博物館附近ｅMontague〔蒙塔格〕街，我閒閒無代誌，diorh專心研究各種科學，增長家己ｅ智識，經營以後出頭天ｅ基礎。Hit當時已經定定有人委託我調查疑難ｅ案件，不斷有人求我破案，主要攏是我一寡老同窗紹介來ｅ。因為我di大學畢業ｅ時陣，我思想ｅ細膩ham手段ｅ敏掠di同窗裡已經真有名a。Musgraveｅ奇案是我做偵探了後ｅ第三個案件。我因為破解zit個案件，ho我做偵探ｅ興趣愈來愈guan，而且zit件案ｅ結果關係gorh kah大。了後我diorh盡力di偵探學頂面拍拚研究，一直到我zitmaｅ地位。」
「Reginald Musgrave是我大學時ｅ同窗，我ham伊平日ma定定有來往。伊ｅ態度真高傲，diorh親像一個貴族ｅgiann孫。所以伊gah同學yin攏無法度足熟悉。伊ｅ漢草無算好，鼻仔真guan，目睭ma真大，mgorh伊ｅ行為舉動suah真溫馴文雅，無失伊ｅ身分。Musgrave家族本來diorh是英國北方一家上gai古老貴族ｅ後代，yinｅ名聲透全國。Di十六世紀ｅ時陣，yin家族中ｅgiann孫，有搬厝去西爿ｅSussex〔蘇薩克斯〕，Reginaldｅ祖先，diorh di zit時陣搬去伊zitma住ｅHurlstone〔賀爾斯頓〕莊園內。所以zitma yin兜ｅ田ham厝攏是祖公仔留落來ｅ家產。伊是一個貴族，雖然現此時家境無外好，但是伊ｅ教養gorh定定表示di伊ｅ講話gah穿衫頂面。我逐gai gah伊開講ｅ時陣，伊定定真呵咾我ｅ思想gah才能。」
「自從畢業了後，我有四冬無看過伊。但是一工ｅ透早，伊hiong-hiong到
我Montague街ｅ公寓來找我。Zit時伊ｅ態度ma是無什麼變化，mgorh伊ｅ衫足sui，已經是一個due時行ｅ紳士lo。」
「阮握手了後，我問伊講：『Musgrave，你近來好無？』」。
「伊講：『我已經變成孤獨ｅ人lo。我ｅ老爸死兩冬a。Ui hit時開始Hurlstone厝裡逐項代誌攏是我愛管理。我ｅ生活真操煩。Holmes，我知影你有特殊ｅ本領。Zitma ziah聽講你ga你ｅ才能應用到實際ｅ事務頂guan。』」
「我講：『見笑！見笑！我不過diorh是靠一寡奸巧當做頭路zuan食nia！』」
「『你做偵探zit途，自然edang發揮你ｅ才能，我替你歡喜。我zitma來zia，diorh是veh請求你ｅ幫忙，因為阮Hurlstone莊園內發生ve少怪事。Hit個警察已經無法度a，所以不得已請你來hia調查，希望esai查明hit寡怪事ｅ真相。』」
「Watson，你想我hit時聽著伊講ｅ話，心內當然足想veh試看mai。因為我di hit段時間已經淡薄仔顯露出我做偵探ｅ才能，iah未遭遇過失敗。所以我自信edang 解決別人無法度破解ｅ案件。」
「我大聲講：『請你ga案件裡ｅ詳情講ho我聽，ho我esai ga zit件代誌細膩推理。』」
「Reginald Musgrave di我對面坐落來，ga我ho伊ｅ薰點ho dorh慢慢仔suh。」
「伊講：『你zitma必須愛知影我ｅ處境，才edang明白hit寡種種ｅ怪事。我雖然是一個羅漢腳，但是di Hurlstone莊園內聽我指揮ｅ使用人卻ve少。因為莊園di真偏僻ｅ所在，人濟ziah edang家己守護家己。而且我逐個月gorh定定出外拍獵，ma一定愛cua使用人做伙去，所以阮兜欠使用人是ve-saiｅ。我厝裡總共有八個查某gan仔[女僕]，一個刀煮師，一個管家，兩個長工ham一個管食ｅ使用人。另外，花園gah馬間內ma有專職ｅ使用人，無包含di我du ziah算ｅ內底。』」
「『Di足濟使用人裡，管家ｅ名叫Brunton〔布倫敦〕。伊是阮老爸時陣ｅ使用人，已經di阮兜服侍足久a。伊iah未來阮兜以前，vat做過小學校ｅ老師，只是因為後來飄泊無依無ua，ziah降格做使用人ｅ頭路。伊生做真清秀，ma是一個辦事敏掠精明ｅ人，所以阮兜ｅ人攏gah伊成為好朋友。伊di阮兜食頭路已經二十冬，mgorh伊zitmaｅ年歲若像gorh iau未滿四十。伊對音樂特別精通，任何樂器攏會曉彈奏，而且gorh有才調講真濟國家ｅ語言。伊有按呢ｅ才能，suah m甘願做zit款奴隸ｅ頭路，應該是因為阮用真情對待伊，所以ziah無願意ho伊離開。伊di阮Hurlstoneｅ使用人中，是一個足特殊ｅ人物。』」
「『Mgorh伊有一個缺點。伊生性愛pa-pa走，是庄仔內有名ｅ薄情少年。伊以前vat結過婚，行為舉止ma真斟酌。後來因為伊ｅ牽手過身a，ziah變款，變gah真愛遊蕩。但是di幾個月以前，伊gah阮兜ｅ查某gan仔——Rachel Howells[瑞契爾．霍惠絲]訂婚a。Mgorh過無外久，伊gorh ham狩獵場ｅ查某qin-a發生感情。Rachel本來是一個真好ｅ查某gin-a，但是有Welsh[威爾斯]人hit款急躁gah容易發性地ｅ天性。因為伊ｅ未婚夫ga伊放sat，ho伊鬱卒gah得著嚴重ｅ腦膜炎。這幾工來，伊真煩躁ve安寧。這diorh是阮Hurlstone莊園內第一幕ｅ悲劇。後來Brunton suah愈來愈奇怪，第二幕ｅ怪事gorh按呢發生a。』」
「『代誌ｅ開始是按呢ｅ：我已經講過Brunton zit個人真巧[聰明]，mgorh 愈巧，愈會做出犯罪ｅ代誌。因為伊家己認為才能無人edang gah伊比，講話舉動diorh真失分寸。我kah早iah未發覺伊ｅ奸惡，zitma親目睭看著怪事，我ziah感覺代誌真嚴重。』」
「『這是我閒閒di厝ｅ時陣發生ｅ。是頂禮拜ｅ一個暗暝──我會記差不多是禮拜四ｅ暗時。我因為di暗頓進前，lim了一杯厚厚ｅ咖啡，ho我睏ve落眠，一直到半暝兩點，ia是睏ve去。所以我diorh爬起來，ga檯頂ｅ蠟條點ho dorh，想veh teh一本小說來讀。我日時讀ｅ冊，攏kng di dong3球〔撞球〕房裡。所以我diorh披著我ｅ外套，teh蠟條出去veh teh冊。』」
「『Veh ui房間到dong球房，我必須愛落一段樓梯，然後經過一段長廊巷。沿hit條走廊一直行到上尾仔diorh是冊房gah槍庫，zit時我hiong-hiong看著一道閃sihｅ燈火ui冊房開ｅ門透出來。我看著感覺足奇怪，因為我di睏以前ui冊房出來，diorh已經ga火bun hua，而且ga門鎖起來a。Zitma看著zit種情況，一定是有人入去vih di內面。阮Hurlstoneｅ長廊ｅ壁頂攏掛滿著足濟古早時陣ｅ兵器。Hit當時我diorh teh了一支戰斧，an-an gim di手裡，gorh ga手中ｅ火bun hua，kng di土腳，然後恬恬m敢發出聲，行到hit片開開ｅ門hia，向內底看去。』」
「『我看著he vih di冊房內ｅ人員diorh是管家Brunton。Hit時伊身軀頂ｅ衫仔褲真整齊，家己坐di一liau安樂椅內。伊腳頭hu頂guan 展著一張紙，看去na親像是一張地圖。伊面前ｅ檯仔頂kng一pa燈火，ui he黯淡ｅ燈光中，看伊兩手抱頭殼，na親像deh苦思。我看著按呢，感覺足奇怪，diorh vih di暗中看詳情。突然間，我gorh看伊ui安樂椅裡kia起來，行到一個冊櫥邊仔。伊teh出鎖匙，拍開櫥門，ui冊櫥內teh出一張紙，gorh轉去椅仔頂坐落來。伊ga hit張紙ia di檯仔頂，di燈下斟酌看。Hit時我看著伊半暝偷偷入去我ｅ冊房，gorh敢偷teh我櫥仔內所藏ｅ冊，zit種行為ho我感覺真受氣，行入去veh責備伊。Zit時Brunton聽著我ｅ腳步聲，回頭看著我teh戰斧kia di門口，diorh急gah跳起來。伊ｅ面充滿了驚hiann，趕緊ga伊du仔看ｅhit張親像地圖ｅ紙藏di袋仔內。』」
「『我受氣deh問伊講：「你竟然做zit種歹代誌！阮平日安怎對待你，zitma你suah按呢報答阮對你ｅ信任。你明仔zai dorh ga包袱仔款款ｅ，離開zia，我vedang gorh請你a。」』」
「『伊聽著我ｅ指責，dorh頭ann-ann，著急逃走a。Hit時檯仔頂ｅ燈火，ma是gorh dorh著，我ui he黯淡ｅ燈光裡，看著Brunton ui橱仔內偷theｅhit張紙，iau留di桌頂。我teh起來看，感覺真驚訝。原來hit張紙寫ｅ不過是我Musgrave祖厝ｅ禮典中無什麼要緊ｅ問答話語。Musgrave祖厝ｅ禮典，是阮兜歷代祖先用手抄落來傳ho giann孫ｅ文件，其中記載ｅ大部分攏是vedang考證ｅ古早ｅ禮制ham ho人無法度了解問答ｅ話句nia-nia。Zit種舊抄件，可能edang ho考古學者做參考，mgorh真正m知伊是安怎注意著zit種無什麼路用ｅ文件。』」
「我講：『你先mai一直講zit個儀式，繼續講落去。』」
「Musgrave有淡薄仔遲疑deh回答：『若是你m愛聽zit個儀式ｅ代誌，我diorh繼續講落去好a。Hit當時我ga Brunton所偷tehｅ紙藏轉去櫥仔内。Gorh ga四周圍看看ｅ了後，我準備veh出去a。Zit時Brunton hiong-hiong gorh走入來，kia di我ｅ面前，ga我ｅ路zah著。』」
「『伊激動，sau聲喝講：「Musgrave先生，我vedang sia zit個面子。我一世人看家己真夠格，無想veh因為zit gaiｅ失策，來破壞我ｅ名聲。先生，你若是zit gai ve-sai寬恕我，我會自殺，ga血噴di你ｅ身軀頂。若是你看di上帝ｅ面子寬恕我，我di一個月內，一定會家己辭頭路，ve ho你為難。Musgrave先生，請你千萬m-tang di眾人面前ga我趕走，按呢我會終身受著屈辱ｅ！」』」
「『我講：「Brunton，你家己做zit種歹代誌，gorh有什麼話tang講？Mgorh既然你di阮兜做kangkue做ziah久，我dor mai ga你ｅ行為講ho大家知影。Zitma我gorh ho你一禮拜ｅ時間，你edang家己包袱仔款款leh離開。一個月ｅ請求有kah長，我vedang答應你。」』」
「『伊ga我哀求：「先生，你ganna ho我一個禮拜ｅ期限嗎？這期限siunn短──這期限真正小可kah短淡薄仔。」』」
「『我足受氣罵伊：「我ho你一個禮拜ｅ期限，ma已經寬赦你a。一禮拜了後，你一定愛離開，m免gorh講什麼a。」』」
「『伊聽著我ｅ話，頭ann-ann走a。伊面色白死殺，親像足鬱卒。我ga火bun ho hua，轉去家己房間。』」
「『事後兩工，Brunton ma是真骨力做伊ｅkangkue，阮ma攏相安無事。Mgorh我想伊離開ｅ時陣，m知veh用什麼藉口，tang掩kam伊做ｅ壞代誌。但是di第三工ｅ透早，伊hiong-hiong無去。一直到我早頓食了，ma無看著伊來我面前服務。早頓食了，我ui餐廳出來，du a好du著hit個查某gan仔Rachel Howells，我du-a 已經ga你講，伊已經破病足久，zit時ziah開始繼續服務。但是我看伊面色無好，na像iah未完全好。』」
「『我講：「你趕緊轉去房間歇睏，ziaｅkangkue，等你身體好了後，ziah來做。」』」
「『伊聽著我ｅ話，用伊hit雙奇怪ｅ目睭ga我相足久。』」
「『伊講：「Musgrave先生，多謝你，我已經真健康a。」』」
「『我講：「咱愛先聽醫生安怎講。Zitma你先停止做kangkue，轉去房間歇睏，你去到樓腳ｅ時陣，替我ga Brunton叫來。」伊講：「伊已經走a。」「走a！伊到dor位去？」「伊確實走a，無人知影伊去dor位。伊已經無di伊ｅ房內。Ai，伊確實走a──伊真正走a！」伊講ｅ時陣hiong-hiong ua di牆邊，親像起痟仝款尖聲一直笑。我看著按呢，趕緊叫人來dau相工ga伊扶轉去房間。伊轉去伊ｅ房間，ma是一直哀一直叫。我趕緊去看Bruntonｅ房間，果然已經無人di a。伊ｅ眠床真整齊，昨暝應該無睏過。但是無人看著伊出去，真正m知影伊是安怎行出厝裡ｅ，連伊ｅ房間ｅ窗仔門透早ma攏關diau-diau。而且伊ｅ衫仔褲、手錶、gah伊ｅ錢ma攏di房間內，mgorh伊定定穿ｅ一領烏衫ham一雙cen拖仔suah攏無去a。我想，Brunton到底是到什麼所在去lo？』」
「『阮想伊可能vih di厝裡，所以diorh di厝裡一直ciau，suah一直無發現伊ｅ蹤影。而且前暝gorh落過大雨，阮莊園厝外攏是爛土，阮diorh去外面找看mai，suah仝款無看著任何腳印。我看伊拋棄一切，hiong-hiong逃走，suah m知伊到底ui dor位出去。所以我感覺足怪異，只好走去報警。警員到阮兜來調查suah無成績，但是奇怪ｅ代誌ia是一直發生。』」
「『Rachel Howells di尾後兩工病gah真嚴重，有時神經錯亂，有時放聲大哭，我diorh請一個看護逐夜看顧伊。Di Brunton離開了後ｅ第三個暗暝，伊ｅ病情na像有kah好，睏gah真熟。看護看著按呢，心頭放kah輕鬆，而且gorh操勞過度，diorh坐di扶手椅頂duh-gu睏去a。等到伊透早睏醒，suah看著眠床已經無人，窗仔門ma拍開，病人已經無去a。我聽著zit個消息，趕緊cua兩個使用人去找。但是看著伊ｅ腳印，踏出厝裡，經過草地，沿一條細條路，一直去到八呎深ｅ小湖hia，但是腳印suah 突然無去a，阮看著按呢，認為hit個可憐ｅ查某，可能是因為傷心過度，跳湖自殺。』」
「『我因為zit個緣故，diorh請人去湖內ho。但是一直攏無找著伊ｅ死體。Mgorh suah di湖裡ho著一個布袋仔。袋仔內藏著一塊古老ｅ金屬物件，色緻足黯淡而且已經生sen，看ve出是什麼物件。另外一方面，袋仔內gorh有幾塊寶石，ma攏無光彩。阮看著zit個物件，更加感覺頭茫茫，一直到昨hng，阮gorh四界探聽，但是ma 攏無Rachel gah Bruntonｅ消息。庄內ｅ警察，早diorh已經用盡智力。所以我只好特別來zia委託你偵探zit件代誌。請你用你ｅ才能，幫我解決zit個案件，你是阮上尾仔ｅ希望a。』」
Holmes講到zia，對我講：「Watson，我zit時聽著伊ｅ話，擋ve diau想veh緊破解zit個案件ｅ真相。Mgorh zit案ｅ情節足奇怪，原因ma真複雜，我一定愛先整理出一寡線索，ziah edang 放手去做。」
「我diorh ga管家ham查某gan仔ｅhiong-hiong失蹤，查某gan仔gah管家ｅ戀愛、伊失戀了後ｅ怨恨，以及伊ｅ起痟，gah伊以後ｅ突然失蹤，一直到伊ga hit個藏著金屬物件ｅ布袋dan di湖內等等ｅ疑點慢慢推測，一時之間suah找ve著什麼線索。我想了真久，真正無法度了解其中到底有什麼神祕ｅ代誌。最後我ziah hiong-hiong了解，找出一條線索。」
「我diorh ga伊講：『Musgrave，我必須先看著hit份文件才edang繼續調查。我想lin hit個管家甘願ho人當做賊仔ham失去伊ｅ頭路去研究zit張紙，推想zit張紙裡一定有什麼祕密。』」
「伊講：『阮禮典內ｅ文字，攏真li-li-lak-lak，足好笑，只是因為阮歷代相傳，ziah ga伊保存完好nia。如果你zitma veh看hit張紙，我zia有he問答話句ｅ抄本。你teh去看好a。』」
伊按呢講，diorh teh ho我一張紙。講：「Watson，這盒仔中藏ｅ一張舊紙，diorh是hit當時伊ho我ｅ。我zitma diorh ga紙頂ｅ內容讀ho你聽。He詞按呢寫ｅ：
『這是siangｅ物件？』『是hit個離開ｅ人ｅ。』『Siang應該得著伊？』『Hit個dit veh到位ｅ人會接受。』『Di幾月？』『Ui一月到六月。』『Di dor位？』『Di橡樹頂guan。』『影di dor位？』『Di榆樹下腳。』『Ui dor位行去？』『往北十步gorh十步，往東五步gorh五步，往南兩步gorh兩步，往西一步gorh一步，diorh di hia下腳。』『咱愛teh什麼去換伊？』『Ga咱所有ｅ一切完全攏送ho伊。』『為什麼愛teh去送伊leh？』『因為信託。』」
「Musgrave看著我研究zit張紙，na像無安怎贊同。伊ga我講：『這原件並無記載年代，但是ui he文法頂guan來看，一定是十七世紀中葉ｅ拼寫法。Mgorh我認為研究zit張怪異ｅ紙，ganna會浪費你ｅ精力，對你無什麼幫助。』」
「我講：『我感覺m是按呢，我認為這確實是一件奇聞。伊ｅ怪異可能比你du ziah ga我講ｅgorh kah怪異，而且各種奇案ｅ情節攏是互相關聯ｅ。Musgrave，請你原諒我，我想你ｅ管家一定是一個足巧ｅ人。伊edang研究zit個奇文，可能伊ｅ才能贏過伊ｅ主人neh。』」
「Musgrave講：『你ｅ意見我m敢認同。我感覺zit張紙對我無什麼路用。』」
「『Mgorh我感覺zit份文件有足重要ｅ意義，我想Brunton gah我ｅ看法仝款。伊開始研究zit張紙ｅ時間，應該是di你看著伊hit夜以前。』」
「『你講ｅ無m對，因為伊veh偷看zit張紙，本來diorh是真簡單ｅ代誌。』」
「『根據我ｅ推測，伊已經得著zit張紙所寫ｅ祕訣。我知影伊gorh有一張gah這問答話句互相參考ｅ圖。你hit工m是有看著伊ga一張親像地圖ｅ紙藏di袋仔内嗎？』」
「『確實是按呢，mgorh伊ganna是阮兜ｅ一個使用人。伊研究阮ｅ舊抄本到底是veh cong什麼leh？』」
「『Zit個問題我zitma vedang答覆你。咱去坐頭一班ｅ火車到Susakesi ，來去lin兜實地考察，ziah edang破解zit個疑問。』」
「Zit工下晡，我gah伊到Hurlstone莊園內。我想你早diorh di圖畫ia是遊記中看過zit個偉大ｅ古堡建築。我zitma ga你講，hiaｅ厝一間接一間，排成一個Ｌ型。長ｅzit排厝，比短ｅzit排gorh kah新。He舊厝門斗真低，頂guan石頭刻著1607年。但是ui zit條看來，na像gorh kah古早。He厝ｅ壁真厚，窗仔門足細，所以yin兜ｅ人，di頂一個世紀diorh搬去新厝a，厝ganna是用來kng物件ｅ所在。厝ｅ四箍笠仔攏是大樹，ui厝開始行兩百碼edang到一個小湖，hia diorh是伊ho著hit個奇怪布袋ｅ所在。厝起di有山有水，風景優美ｅ一個所在。」
「Watson，我zit時已經有淡薄仔把握，感覺zit代誌並m是足神祕。Zit案ｅ關鍵dor是Musgrave yin兜典禮內問答ｅ話。若是我edang解這其中ｅ祕密，Brunton gah Howellsｅ失蹤，diorh esai完全明白。Brunton到底是為什麼理由veh研究伊主人ｅ冊？伊甘願冒著危險，放sat伊ｅ一切hiong-hiong失蹤，可見一定是有什麼重大ｅ原因。」
「我diorh ga he儀式ｅ話句gorh反覆讀足濟gai。我感覺雖然伊ｅ描寫足奇怪，mgorh suah na親像he偷偷ｅ講一種測量。這雖然是我ｅ假設，mgorh我知影he問答話句中清清楚楚講出橡樹gah榆樹兩種物件，攏一定是測量時用ｅ標準。因為di厝外ｅ倒手爿栽足濟橡樹，我看著一欉橡樹足guan足guan，diorh gorh kah相信我ｅ料想已經真接近事實a。」
「阮講到hiaｅ時，行過hit欉橡樹，我ga伊講：『這樹ｅ年代，應該ham lin ｅ儀式ｅ年代差不多久吧？』伊應講：『這樹gorh是諾曼第時代ｅ戰利品。伊ｅ年代，可能比阮ｅ禮典gorh kah古早。Zit欉樹有三十三呎左右。』『Lin另外gorh有榆樹嗎？』『He ma是一欉真古早ｅ樹仔。但是di十冬前ho雷火燒死，阮早diorh已經ga伊ｅ根部掘去a 。』『你gorh edang講出he樹仔kah早ｅ遺址嗎？』『我以前定定看著，zitma自然gorh edang講出來。』『Zia gorh有別欉榆樹嗎？』『Ganna有zit欉老榆樹，其他ｅ攏是一寡矮矮ｅ小樹nia-nia。』『我想veh先去看hit叢老榆樹ｅ遺址。』」
「阮diorh坐雙輪馬車，直直行到hit間厝外ｅ草地頂guan。Hia有一個無草ｅ所在，hit qiah diorh是榆樹ｅ遺址。我發覺zia du du好diorh di厝gah橡樹ｅ中間。」
「我問講：『我想咱無可能知影zit欉榆樹ｅguan度吧？』」
「『我edang ga你講，hit欉樹仔攏總guan六十四呎。』」
「我驚一dior，問：『你哪會知影？』」
「『我以早gah我ｅ家庭教師練習三角數學ｅ時陣，定定測驗逐項物件ｅguan度。因此我對各種樹仔gah建築，攏會測定yinｅguan度，絕對無可能m對。』」
「我聽著zia-e話，感覺真歡喜；但是我zit時hiong-hiong gorh得著另外一種感想。」
「我問伊講：『請你ga我講，linｅ管家vat問你榆樹ｅ代誌嗎？』」
「Reginald Musgrave真著驚ga我相，稍歇一下，伊ziah 講：『Zitma我聽了你講ｅ話，我ziah想起來幾個月前，我ham幾個使用人開講ｅ時陣，Brunton確實問過我zit個問題。』」
「Watson，我zit時gorh kah確定我ｅ推理是對ｅ。我qiah頭看日頭，日頭已經dauh-dauh-a往西爿去。我想di一點鐘以內，diorh會sua到hit欉老kok-kokｅ橡樹枝頂guan，diorh會gah he儀式內ｅ問答話句互相呼應。所以我gorh想著gah hit榆樹ｅ影有關ｅhit幾句話，我iorh一定是di日頭照di橡樹頂guanｅ時陣，看著he榆樹ｅ影。Di he樹影上尾仔ｅ所在，一定diorh是儀式話句中he主要ｅ標記a。我ganna愛di he日頭照di橡樹頂ｅ時陣，找著he榆樹影上尾仔ｅ所在，定著edang找著案件ｅ線索lo。」
我聽到zia，擋ve diau插話講：「Holmes，這確實是案中主要ｅ線索。Mgorh he榆樹已經ho人挖去，應該找無伊ｅ影a。」
Holmes講：「無錯，mgorh既然Brunton edang找著，我一定ma edang找著。Zitma既然無樹身，我diorh ham Musgrave轉去厝裡，我先做一個木釘仔，gorh di頂guan縛一條長長ｅ索仔，di紙頂每隔一碼，我拍一個結。另外，我又gorh teh兩枝釣篙仔〔釣竿〕接做伙，du好六呎長。阮做伙出來，hit時日頭已經照di橡樹頂guan，我ga釣篙仔cai di榆樹ｅ遺址hia。日頭照著釣篙仔產生ｅ影，用索仔一量，du du好九呎。」
「我看著zit個影，dor edang推測榆樹影ｅ長度lo。因為釣篙仔長六呎，影有九呎，若按呢，榆樹guan六十四呎，以比例來算，diorh edang知影榆樹ｅ影攏總長六十四呎lo。所以我diorh用索仔di土腳量，he榆樹影上尾仔已經到厝ｅ邊仔，我用木釘仔釘di hit爿ｅ土內。Watson，zit時我非常歡喜，因為ui我釘釘仔算起兩呎ｅ所在，ma有一個用木釘仔釘過ｅ細空，gorh留di土腳。我一看diorh做zit個記號，ma知影he是Brunton留落來ｅ記號a。」
「續落去，我ui袋仔內teh出羅盤，找出方向，然後ui厝ｅ壁爿，往北行二十步，做一個記號了gorh往東行十步，往南行十步，hit時我行到一間舊厝ｅ門腳口。然後我按照儀式裡講ｅ話，gorh往西行兩步，diorh行到hit扇門倒爿ｅ石頭仔路去a。」
「Watson，我di he日頭照ｅ光內，細膩觀察hit爿ｅ石頭，看起來真平整，na親像已經足濟年無ho人sua動過。我diorh用我ｅ手枴仔kok hiaｅ石板，mgorh攏無聽著任何空空ia是奇怪ｅ聲。Zit時我感覺真失志，想講Brunton可能iah未做到zit種地步。Hit時Musgrave對我做zia-e調查，伊知影我ｅ用意。伊看著我躊躇ｅ款，na像有什麼新ｅ想法，伊ga我講：
『你敢講ve記儀式中ｅ「diorh di zia下腳」hit句話a？你對zit句diorh di下腳ｅ話，為什麼無研究leh？』」
「我聽著zit句話ｅ意思，hiong-hiong覺悟過來，我叫講：『敢講zia gorh有別個地下室？』」
「伊講：『是a，diorh di zit片門後壁，he地下室ｅ年歲，ma ham zit間厝仝款古老a。』」
「阮diorh做伙拍開hit片舊門，ui石樓梯入去，內底非常烏暗。阮點著一枝番仔火，ga he壁頂ｅ一pa燈點dorh，ziah di燈火中看見厝裡ｅ模樣，na親像已經有人先來過。我想一定diorh是Brunton lo。」
「Zia疊ｅ柴ko，早diorh已經sua開變做一條窄窄ｅ小路，一直到一塊足大粒ｅ石頭hit爿。Hit塊石板ｅ中央，裝著一個已經生senｅ鐵箍仔，頂頭gorh縛一條長長ｅ巾仔。Hit塊巾仔足堅固，edang提起重ｅ物件。」
「我ｅ朋友大叫：『天a，這是Bruntonｅ物件a。我定定看著伊teh zit條巾仔，edang確定he diorh是伊ｅ物件。但是伊為什麼veh di zia做zit種代誌neh？』」
「我看著按呢，無閒gah伊講話，diorh趕緊去sa著圓箍仔ｅ長巾仔，出力去掀hit塊石板。但是hit塊石板siunn過重，我一個人無法度，我diorh去叫庄仔內ｅ警察來dau相工。阮足濟人用盡氣力，ziah ga hit塊石板sua到邊仔。石板sua到邊仔了後，diorh出現一個四角形烏暗ｅ地下室。Musgrave teh燈仔火照dui下面去。」
「He地下室真細間，大約ganna有七呎深，四箍笠仔攏是四呎，內底好像是一間gorh kah細間ｅ小房間。Di壁邊有一個柴做ｅ箱仔，ui he燈光內看去，箱蓋suah開開。箱仔ｅ邊仔有一個舊舊ｅ銅鎖匙，凸出di鎖匙空外。箱仔內卡足濟青苔，看起來青sun-sun，早diorh已經生蟲，足破舊a。我看內底只有一寡圓ｅ金屬物件，其他什麼攏無。」
「阮準備研究zit ka柴箱仔，hiong-hiong gorh看著箱仔邊有一堆烏烏ｅ物件，he是一個穿烏衫ｅ人跪di土腳，伊ｅ身軀往前趴，頭ua di箱仔頂，雙手直直ｅkng di兩爿。阮看著，攏驚一dior，diorh做伙行入地下室。摸zit個死體，早diorh已經ding-kok-kok，看起來已經死真濟工a。伊ｅ頭殼因為趴di土腳ｅ時間有一下仔久，血結凍di面頂，變做茄仔色，看起來足奇怪，已經無人edang認出伊是siang。但是伊ｅ嘴鬚、伊ｅ衫仔褲gah伊ｅ頭毛等等，我ｅ朋友已經認出這diorh是伊ｅ管家。但是我看伊身軀頂完全無傷痕，m知伊是安怎死ｅ。過一段時間，阮diorh ga zit個死體扛出地下室，但是阮對其中ｅ情形猶原是霧sa-sa。」
「Watson，我原先ｅ計畫，認為照he禮典中ｅ怪話慢慢仔去找線索，入去hit個祕密ｅ地下室，diorh edang破解zit個案件。但是我zitma雖然找著Bruntonｅ死體，suah iau是霧sa-sa，m知veh安怎。我想Brunton會死，應該gah hit個查某人hiong-hiong失蹤，ham hit個柴箱仔裡所藏ｅ物件等等足濟足濟ｅ事件，攏是真歹了解ｅ怪代誌。所以我diorh坐di厝腳hit個柴桶仔頂guan，分析真濟疑點，想veh知影代誌ｅ真相。」
「Watson，你敢知影有一寡案件，靠我ｅ假設diorh edang解決案件中ｅ祕密。Zit個案件ma是其中一個。Hit當時我既然知影zit個案件ｅ情況，第一步diorh憑著Bruntonｅ行為，推測伊進行ｅ步數：伊一開始知影儀式ｅ祕密，入來zit個地下室，伊ｅ目的，一定是veh得著zit個地下室內所藏ｅ寶物。但是伊一個人ｅ力量，是無法度sua動地下室頂guanｅhit粒大石頭。按呢伊第二步veh安怎做？所以伊一定愛別人dau相工。Hit當時有法度ga dau相工ｅ人，一定diorh是厝内ｅ人。因為伊做賊，一定愛di半暝動手，但是hit陣門窗gorh關diau-diau，若是伊veh叫人dau相工，diorh一定愛是厝裡ｅ人lo。但是伊veh叫什麼人來dau相工neh？Di伊ｅ心內，一定認為上gai有法度信任ｅ人ganna有hit個查某gan仔。因為查甫人攏m知影家己ｅ薄情，又gorh看ve起查某人，掠準用一寡技巧，diorh edang恢復查某人kah早對伊ｅ感情，甘願ho人利用。伊diorh是有zit款想法，diorh誘拐hit個查某gan仔，希望恢復以早ｅ感情，而且要求伊dau相工為伊做歹代誌，Howells本來diorh是一個無主張ｅ查某人，容易ho伊誘拐，答應伊ｅ要求。Hit一暝，yin兩個diorh做伙sua開hit塊大粒石頭。」
「但是yin ganna有兩個人，一個gorh是查某人，做zit款搬石頭ｅ粗重kangkue，一定無法度。因為我gah所有Susakesiｅ警察用盡氣力ziah ga hit石頭移開。按呢，yin安怎克服zit個難題？一定是愛靠別項物件來dau相工。我一想到zia，diorh kia起來，斟酌看著土腳hia疊ｅ柴ko。Hiong-hiong看著一枝柴ko仔，大約有三呎長，一爿有一條bit-sun，gah別枝柴ko完全無仝，我diorh知影Brunton edang入去zit個地下室，一定是靠著zit枝柴ko仔。我想yin一定先qiu hit條石頭頂ｅ長巾仔，ho石頭出現一條bit-sun，然後diorh ga hit枝柴koｅ一爿插入去bit-sun內，用力攪動，hit塊石板diorh ho柴ko dauh-dauh-a giau開lo。一直到hit塊石板sua開到ho一個人出入，ziah用hit枝柴ko du ho diau，因為若無按呢，hit塊石板diorh會gorh合起來。但是因為石頭siunn重，hit枝柴ko di土腳ｅ一爿，diorh出現hit個bit-sun。」
「然後，我繼續推理Brunton到底是安怎死ｅ，我想hit個地下室既然ganna有法度ho一個人出入，按呢入去地下室ｅ人，一定diorh是Brunton lo。Hit個查某gan仔一定diorh守di地下室外口等待。Brunton將箱仔內ｅ物件teh ho查某gan仔，家己suah猶原留di地下室，ga四箍笠仔ka透透，想veh滿足伊ｅ慾望。但是後來發生什麼代誌？Iau gorh發生什麼變化leh？」
「我認為di伊diam地下室ka透透ｅ時陣，hit pa怨毒ｅ火，diorh di Welsh查某人ｅ胸kam內gorh再dorh起來。伊想起以早ｅ代誌，真怨毒，而且hit時陣，iau gorh縛di伊ｅ手內，伊diorh想講不如tai死zit個薄情人，出一口怨氣。但是伊veh安怎下手leh？無的確diorh是伊ga柴ko teh走，ho石頭合起來，ga Brunton害死，無的確伊認為這diorh是伊應該有ｅ命運，ziah按呢做ｅ。但是無論安怎，Brunton已經活活hong埋di地下室內。」
「Howells ga hit粒石頭合起來，趕緊teh著ui地下室內得著ｅ珍寶，走走出去。但是伊beh樓梯ｅ時陣，真清楚聽著伊ｅ舊情人di地下室用手long石壁ｅ聲。Zit種求救ｅ聲伊一定聽gah真清楚。」
「伊本來有腦膜炎，聽著zit種怪聲diorh驚一dior，所以di第二工ｅ透早，痟笑到上尾仔，伊舊症頭iann起來。但是hit ka箱仔內到底是藏什麼珍寶？伊以後又gorh是安怎做leh？我想diorh是我ｅ朋友ui湖中勾著ｅ布袋，gah袋仔內所藏ｅ古早金屬物件。He一定是伊病kah好ｅ時陣，恐驚代誌爆發，diorh ga hit 個物件全部dan入湖中，然後走去別ｅ所在，希望家己脫罪。但是物件suah ho我ｅ朋友勾著。」
「我想了二十分鐘，diorh無疑問破案a。Hit當時Musgrave猶原面色白cang-cang，kia起來想一寡代誌，無外久，gorh越頭行入地下室。」
「伊ui柴箱仔裡teh出一寡金銀角仔，轉來ga我講：『這是英王Charles一世時陣ｅ遺物。我講阮兜ｅ禮典，當然diorh是hit時ｅ舊抄本。』」
「我聽著伊ｅ話，diorh了解禮典內問答話句ｅ意思。所以我diorh講：『咱愛gorh找著一寡Charles時代ｅ其他物件。請你ga你勾著ｅ金屬物仔ho我看，我ziah edang明白zit個案件ｅ真相。』」
「阮diorh做伙轉去伊ｅ冊房。伊將勾著ｅ逐項物件ho我看。我ziah明白伊為什麼會認為hit個物件攏無價值，因為yin攏真黯淡，金石ma ho土沙粉仔kam gah無什麼光彩。我hit當時teh著zit粒寶石，di我ｅ衫頂guan拭拭leh，hit粒金石diorh閃閃sih-sih，親像一粒星。Hit個金屬因為長時間埋di土腳，已經變形凹去a，但是猶原edang看出是一種重複ｅ圓箍仔。」
「我講：『我認為zit個物件，一定是英王Charles死了後，hia-e貴族m敢zah出國ｅ珍寶，所以diorh將hia珍寶埋di土腳。Yin偷偷ga埋ｅ所在記落來，di日後平安轉來國家了後edang teh出來，zia-e物件一定diorh是hit當時所埋ｅ寶物lo。』」
「我ｅ朋友講：『可能是按呢無m對。因為我ｅ祖先 Sir Ralph Musgrave本來diorh是Charles一世時陣ｅ保王黨。Charles二世走出去di外口ｅ時陣，diorh將伊當做心腹。』」
「我應講：『好a，zitma咱已經得著最後ｅ解答lo。你雖然經過足濟代誌，但是你祖先仔所藏ｅ祕密寶貝，已經ho你找著lo，而且gorh了結歷史上一件重大ｅ公案。』」
「伊足奇怪deh問我講：『按呢，這到底是什麼珍寶leh？』『這m是別項物件，這是英國古早時代ｅ一頂王冠。』『王冠嗎？』『確實是。你敢ve記，禮典ｅ問答話句是安怎講ｅ嗎？Hit句「zit項物件是siangｅ」、「是hit個走了ｅ人ｅ」ｅ話，diorh是清楚講出這是Charles一世ｅ遺物lo，按呢，he「siang應該得著伊」、「hit個diorh veh到位ｅ人」一句，斟酌推理伊ｅ用意，diorh是講Charles二世lo。我推測yin做zit種奇怪ｅ問答，diorh是veh ho後代ｅ人edang照按呢來走找，重新找著zit頂王冠nia。』『若按呢，是安怎會iau gorh di 湖裡neh？』『Zit個問題，m是一時陣diorh edang回答ｅ。』我diorh ga du-a所得著ｅ理解，對伊詳細解釋。我ｅ話講了，月娘已經升到頭殼頂a。」
「Musgrave聽了後，na將hia-e物件kng入去袋仔內，na問講：『Zitma經過你ｅ解釋，代誌已經明朗lo。Mgorh Charles二世回國了後，若無追問zit個王冠leh？』」
「『其中ｅ祕密，我ma無法度去知影。無的確yinｅ祖先死di外國。而且lin zia-e giann孫suah 無注意禮典ｅ用意，一直到zitma，zia-e寶物ziah發現。』」
「Watson，這diorh是Musgrave禮典ｅ故事。Hit頂王冠diorh留di Hurlstone莊園裡──無的確yin diorh愛經過法律ｅ手續gah金錢ziah edang保留王冠。但是你到hia，只要報我ｅ名，diorh esai看著zit個古早ｅ王冠lo。Mgorh ui hit陣開始，hit個查某gan仔diorh失蹤lo。無的確伊已經離開英國，走去海外lo。」
Original Post on Pixnet