細觀Miss Potter
許倩毓
一、 前言
電影Miss Potter[波特小姐] 中，藉著描寫Miss Potter伊充滿挑戰ｅ出冊過程，來呈現伊gah動物互動ｅ情形ham伊前衛ｅ思想gah樂觀ｅ個性。Zit篇報告將藉電影ｅ內容討論Miss Potter gah動物互動ｅ情形如何影響伊對環境ｅ看法，ma分析Miss Potter身為女性di hit個時代所受ｅ限制，了後討論Miss Potterｅ個性對伊ｅ成就ｅ影響。
二、 動物gah環境
Ui電影中edang發現Miss Potter看待動物ｅ方式gah一般人無仝。伊將每一隻動物攏當作人仝款，gah yin講話、分享家己ｅ心情。伊甚至edang看著畫中ｅ動物deh din動、看著yin deh cittor、ia 是deh無歡喜。對Miss Potter 來講，動物gah人是無差別ｅ，不管是人ia是動物，攏是有生命ｅ、有感情ｅ，攏edang體會環境ｅ變化。伊zit款保惜生命、尊重生命ｅ觀念真值得咱ｅ學習。
Miss Potter zit款愛護生命ｅ想法ma影響伊對環境保護ｅ重視。Di Miss Potter 細漢ｅ時陣，伊ｅ老爸每冬攏會cua伊去湖區渡假，所以自細漢Miss Potter dior 定定gah大自然有接觸，對伊來講，湖區不止是渡假ｅ所在，ma是充滿細漢時期記憶ｅ所在，對zit個所在伊是有感情ｅ。另外，因為Miss Potter 是zia ni a 珍愛動物，ia大自然是動物生存ｅ所在，所以edang講Miss Potter 對環境保護ｅ重視是源自伊對動物ｅ愛護。
Dior是因為自細漢diorh ham湖區培養感情，gah加上對動物ｅ喜愛，對 Miss Potter 來講，湖區ｅ保護edang講是伊ｅ生命。伊出錢出力，甚至到死後，gorh將遺產ｅ一部份捐出來做湖區保育ｅ基金，diorh是為著保護湖區自然ｅ景色ve受污染gah破壞。
Di hit陣，正是工業革命後ｅ時代，不管是工業ia是經濟攏快速發展，對土地ｅ開發也愈來愈緊、愈來愈濟，大部份ｅ人攏dann注意著繁榮ｅ經濟ham愈來愈好ｅ生活條件，真少人會注意著環境保護ｅ議題，閣卡m免講是提家己ｅ錢出來提倡環境保護，但是ziaｅ代誌Miss Potter 攏做到a。Zit款前衛ｅ想法，ma說明了Miss Potter 是一位有想法而且心胸寬闊、眼光長遠ｅ人。
三、 女性ｅ壓力
Di 19世紀後期到20世紀前期hit個保守ｅ時代，身為一位女性，Miss Potter 所受ｅ社會壓力是真大ｅ。Hit當陣社會對女性ｅ看法閣真保守ma真古板。女性di當陣hong認定應該趁少年diorh愛結婚，ma無需要讀qua濟冊，更m免出外趁錢。但是Miss Potter 真幸運，伊ｅ老爸di伊細漢ｅ時陣diorh請一位家庭教師來教伊，ho伊自細漢就裁培看冊ｅ興趣，也因此拍在了伊後來寫冊ｅ基礎。
女性ｅ婚姻di hit陣ma 受著多方面ｅ壓力，大部份ｅ人認為女性應該趁少年緊嫁翁、生囝，了後好好diam di厝內相夫教子。Zit款觀念di當時深深deh壓迫女性di各方面ｅ發展，di電影中ma edang發現Miss Potter e阿母就是一心希望伊edang緊找一個身份、地位、財產攏配會起yin厝ｅ人嫁過去。但是Miss Potter 知影，伊愛ｅ是一個edang陪di伊身邊，gah伊開講、分享生活樂趣、講心內話ｅ人。
Miss Potter 真知影家己deh創啥，ma真知影家己心內真正ｅ感受，所以並無聽信yin媽媽對伊婚姻ｅ安排。但是這並無代表Miss Potter 無希望得著愛情，當伊du著伊心內理想ｅ對象時，伊ma是全心全意去愛hit個人。雖然伊ｅ第一段感情並無美好ｅ結局，ma ho伊陷入深深ｅ痛苦當中，但是伊後來ia是ui痛苦ｅ深淵中行出來lo。尾手ma找著 edang陪伴伊一世人ｅ人，做伙行完伊精彩ｅ一生。
四、 個性gah成就
Ui第二gah第三節中edang看出Miss Potter是一位兼具理性gah感性ｅ人。對待動物時，伊將動物當作人仝款對待，ham yin講話、談心；對待感情時，伊付出全心去愛hit個人；當伊ｅ愛人離開時，伊也vat因為悲傷無法度冷靜、振作，這攏代表Miss Potter 感性ｅ性格。
當伊面對家己ｅ理想時，展現ｅ是理性ｅ伊。為著出冊伊找過真濟出版社，雖然hong拒絕真濟gai，伊猶原m願放棄、堅持理想，做伊認為對ｅ代誌。對環境ｅ保護伊ma有伊ｅ堅持，伊付出心力維護湖區ｅ自然景色、反對過分ｅ開發，閣出資來為湖區ｅ保護做實際ｅ奉獻。當伊面對愛人ｅ死，雖然vat因此消沈，但尾手ia是堅強ｅ行出悲傷，繼續完成伊ｅ理想。這攏是理性ｅMiss Potter。
感性ho Miss Potter edang體會別人無法度體會ｅ代誌；ho伊edang觀察著身邊每一項變化；ho伊edang享受愛情ｅ甜美；ma ho伊edang寫出動人ｅ故事。理性ho Miss Potter edang堅持自己ｅ理想，ve清彩放棄；ho伊面對壓力時edang堅強；ma ho伊di失去愛人了後，edang閣重新kia起來。
當面對挑戰ｅ時陣，人總是會驚惶，siunn感性ｅ人定定無法度冷靜思考做出正確ｅ判斷，siunn理性ｅ人有時suah做了siunn超過，ho人感覺無通情理。但是就是因為Miss Potter 兼具理性ham感性，ho伊edang冷靜思考每一項問題，將問題一項一項解決，但是伊ma會顧著人情ve做siunn超過。Zit款ｅ處事態度決定了Miss Potter 後來ｅ成功。
五、 結語
綜合以上ｅ討論，edang發現Miss Potter （1866-1943）雖然活di跨頂世紀前，但是伊ｅ想法已經超越當時保守ｅ觀念。身為一位有知識ｅ女性，伊並無因為社會壓力浪費伊ｅ才能，堅持理想也ho伊成為有名ｅ作家。不只是對家己ｅ人生有規劃，對身軀邊ｅ每一項代誌攏真關心，ma對環境ｅ保護真重視。Miss Potter 破除當時社會對女性ｅ限制，成功創作出一個新ｅ女性模範，也為伊家己di後世留下ve hong放vue記ｅ名聲。
Original Post on Pixnet