「台音輸入法」ｅ使用心得
游政榮
1990年代hit當陣，有真濟人投入台語文運動，開始使用台語來書寫文學作品，mgor di漸漸進入電腦化ｅ時代，pah〔打〕字慢慢仔取代寫字，電腦愈來愈進步閣非常方便，用電腦寫文章變作一種趨勢，ho寫台語ｅ人感覺真困擾，因為yin無適當ｅ台語輸入法tang用，di寫作上真無方便。
後來，有一寡人開發出台語ｅ輸入法，其中由清華大學統計所ｅ江永進副教授所設計ｅ「台音輸入法」，是上好用、上進步ｅ台語輸入法，使用上手以後，不管是什麼款ｅ中文、台語輸入法，攏會ho你感覺ve慣勢，因為「台音輸入法」用久了後會diau著〔上癮〕，若是電腦內無zit個輸入法，一定會想veh安裝。
「台音輸入法」ｅ第一版是用「TLPA」拼音輸入ｅ，後來ziah換作通用拼音，而且edang用台語、華語、客語三種語言ｅ模式輸入，伊ｅ優點主要有以下幾項：
1.「台音輸入法」是用英文字母拼音輸入ｅ，a英文字母di齒盤〔鍵盤〕頂是上大字ｅ，對慣勢看齒盤ziah edang pah字ｅ人來講，真緊dor esai cue著veh pahｅ字母，提高pah字ｅ速度。
2. M管是數字、英文gah標點符號，攏edang di「台音輸入法」來pah出來，m免切換，尤其是標點符號上定用ｅ逗號、句號，只要連續cih〔按〕兩下，diorh esai pah出全形字。另外閣有常用、專用輸入鍵，比如：輸入“q”，頭一字是「我」，輸入“qq”頭一字是「阮」。
3.對常用詞ｅ出現頻率做調查、統計，ga上定出現、使用ｅ詞彙列di仝〔同〕音詞ｅ頭一個，所以真緊dor edang cue著veh輸入ｅ語詞。
4.自動記錄使用者上ziap〔常〕使用ｅ語詞gah單字，將zia-e語詞、單字列di仝音詞ｅ上頭前，m免閣去cue字、選字。
5.音頭提示gah音頭輸入ｅ功能：比如pah“d”，dor會出現“d”開頭ｅ語詞；pah“srh”dor會出現「輸入法」，是智慧型ｅ輸入方式。
6. Na pah na唸〔邊打邊唸〕ｅ功能，輸入ｅ拼音esai由電腦發音，一面pah字一面學台語，實在真利便。
7.Cih“F11”edang加詞，依照使用者ｅ習慣加入常用語詞，是一種開放性ｅ輸入法。
雖然優點ziah濟，mgor zit個輸入法ma是有伊ｅ無法度顧著ｅ所在，diorh是veh pahｅ字詞如果出現頻率ka低，diorh愛加用一寡時間去選字，這是我唯一感覺ka無效率ｅ所在。
我使用「台音輸入法」已經超過五年a，到目前為止，我並無感覺著伊due ve著時代，可見當初ｅ設計是qua-ni〔多麼〕先進gah人性化。不管是厝裡、宿舍ia是學校，只要我會使用著ｅ電腦，攏會安裝「台音輸入法」，因為我若是用其它ｅ輸入法，pah字ｅ速度會變gah非常ｅ慢。Du開始用「台音輸入法」ｅ時，iah無sann慣勢，除了比新注音輸入法加真濟選字、選詞ｅ動作以外，di鍵盤頂用注音符號轉pah英文字母ma愛經過一段時間適應。熟手了後，我用「台音輸入法」ｅ台語模式pah中文，發現比pah台語文ka緊，因為中文已經標準化，台音輸入法閣有收華語詞，a台語文除了漢字，閣有拼音文字，每一個人選用ｅ字無完全仝款，再加上腔口ｅ差別，所以pah台語會ka慢一sut仔。Mgor若是用台語模式pah有專門性ｅ中文，dor無ka緊a。
科技gah人文是互相影響ｅ，科技是經由人類創造性ｅ思考發展出來ｅ，伊是人類文化ｅ一部分，好ｅ科技往往edang幫助文化ｅ提升，閣esai改善人類ｅ生活。江永進老師以統計學ｅ學術背景結合程式設計，自比為電腦烏手（軟體上），為推展台語開發出幾a項幫助學習ｅ工具，包括輸入法、拼音練習程式、自動注音程式等等，完成以後閣做修改，ho程式發揮上好ｅ效果。學統計ｅ江老師會去思考每一項數據背後所代表ｅ意義，di咱ｅ社會環境，為什麼學會曉台語拼音ｅ人ka少，學ve曉ｅ人ka濟，問題到底出di dor位leh？為著對學拼音有困難ｅ人，江老師一直deh改進拼音教學法，ma製作edang發音ｅ練習程式，伊m放棄有心veh學mgor學ve曉ｅ人，定定deh思考按怎ga學台語、寫台語變作輕鬆又簡單ｅ代誌。Di伊身上，我觀察著學數理ｅ人gah學人文ｅ人有無仝款ｅ思路，所以科技gah人文一定愛對話，人類ｅ文明ziah會愈來愈進步。
1930年代黃石輝di〈怎樣不提倡鄉土文學〉內面講：「你是台灣人，你頭戴台灣天，腳踏台灣地，眼睛所看見的是台灣的狀況，耳孔所聽見的是台灣的消息，時間所歷的亦是台灣的經驗，嘴裡所說的亦是台灣的語言，所以你的那枝如椽的健筆，生花的彩筆，亦應該去寫台灣的文學了。台灣的文學怎樣寫呢？便是用台灣話做文，用台灣話做詩，用台灣話做小說，用台灣話做歌曲，描寫台灣的事物，卻不是什麼奇怪的一件事。」七十外年前ｅ先輩di殖民政府統治下，dor已經主張寫台灣話文，zitma有ziah好用ｅ「台音輸入法」，更加無理由m寫台語文。用咱家己ｅ語言書寫ka edang表達咱ｅ文化，有咱家己ｅ觀點；每一個族群ｅ人若是攏有zit種自覺，透過母語書寫建立自信，同時留下書面語ｅ資料，對文化香火ｅ代代相傳，會有真大ｅ貢獻。
Original Post on Pixnet