爸爸ｅ手風琴 張春凰

爸爸ｅ手風琴  張春凰


爸爸ｅ樂器，前後有烏笛仔、小吹、口琴、小提琴、手風琴、鋼琴、電子琴。講前後ｅ意思是用印象中ｅ深淺來區分ｅ，時間ｅ順序並無重要。

爸爸真少年ｅ時陣，參加過西樂ｅ樂團gah樂隊，媽媽講伊bun過烏笛仔、小吹，但是這我並無記憶。Di中學ｅ時學校veh考口琴ｅ樂器，我dor vat請教過爸爸。小提琴、手風琴、鋼琴、電子琴dor時常聽伊qiu彈過，其中上ho我欣賞ｅdor是手風琴。

Di我ｅ心目中，手風琴應該講是專屬爸爸ｅ代表。

爸爸並m是啥麼了不起ｅ音樂家，伊只不過是一個真隨意ｅ自我娛樂ｅ演奏者。伊qiu violin、彈手風琴、piano、電子琴ｅ樂曲，其實攏是仝款真少有變化，mgor伊ma是從來dor mvat看譜。逐遍伊攏彈仝一組樂曲，樂曲中，伊所演奏ｅhit首“何日君再來”ｅ曲調若響，大概ma知影伊ｅ個人音樂會dor是dih veh結束啊。

若聽著伊deh cih奏zit首樂曲ｅ時陣，感染著不只是伊完全投入ｅ感情，閣是伊愈彈愈入神，假若行雲流水ｅ表演技術dann真真正正有專業ｅ水準。Zit首曲ｅguan低，到zit個時陣有一定ｅ間奏出現。本來阮攏dor忍受伊一開始假若deh練習ｅ歌曲，不時dor有一點仔tai雞割m斷管ｅ聲，慢慢順溜了後，一直到最後“何日君再來”ｅ出現，情勢dor一定轉360度。Zit個時陣，阮會due伊ｅ音樂唱，甚至會暫停手邊ｅkangkue ga伊拍奏，原因dor是伊釋放出來ｅ是一種自由，zit種自由ｅ氣味是一般普羅大眾ｅ心聲，伊一直deh吸引阮閣ho阮有參與感。奇怪ｅ是du好是阮dann veh開始參與，伊dor一定結束，連阮veh叫“encore”ｅ機會dor無。

Zit種感覺從來dor無di伊qiu小提琴、彈鋼琴gah電子琴出現過。

細漢ｅ時，媽媽總是以爸爸做第一，比如：食飯ｅ時，爸爸若暗轉來，媽媽一定愛特別ga阮交待阿爸仔iau ve食，需要留伊ｅ額；洗爸爸ｅsetzu一定愛用米am漿過，等候daｅ時，卡閣熨ho平坦坦cinn-cinn。爸爸dor是一家伙仔ｅ龍頭，伊ｅ權威性十足，但是去動伊ｅ手風琴，我dor有一種講ve出來ｅ勝利感，至少是摸會著閣無任何心理壓力ｅ代誌，這講來講去其實是對大人ｅ世界ｅ好奇。而且接近手風琴並無di受著禁止ｅ行列，而且伊摔ve歹去，是無親像hit當時物質缺欠ｅ時陣，ganna摃破一塊玻璃甌dor該死a。接近手風琴ho我有滿足感，因為琴我抱無法，上加是將琴盒仔拍開，ga琴齒ｅ所在diorh起來ho出聲，其實手風琴攏m免摸著琴齒，ganna ga琴齒qiu開掠起來dor有聲，雖然是亂七八糟ｅ聲，總是m免具備特別ｅ技巧dor有音流出來，這dor阿草ｅ心適。

想veh做一個百萬富翁ｅ夢想，不但di平民ｅ心目中一直deh追求，dor是di電視連續劇ｅ角色內面一直有總經理、董事長ｅ身份安排。成功是疊實加上運氣好，失敗是虛榮du著歹運。少年ｅ時陣，爸爸一定想過veh過好日子，但是想罔想，彈琴ｅ時陣應該講是將生活ｅ現實拋開一爿，輕鬆一下。當年做ve成百萬富翁，至少手風琴ma陪伴著爸爸一路行過來。伊一世人起二遍大厝，二落大厝攏有伊ｅ琴聲繚繞著。

“你以前去阮兜，gam vat聽過阮老父彈手風琴?”寫到zia我忍未diau問阮翁，伊講“有！有！”

“媽媽a，爸爸ｅ手風琴leh? Hiah-gak去啊是m是?”長途電話開嘴dor問，“無啊！無啊！he是古董，kng di樓腳。”

後回轉去後頭厝一定愛去看看leh！看爸爸ｅ手風琴。

如今爸爸ｅ耳孔攏重聽lo！我ma mgann問伊何時會使閣彈一曲“何日君再來”，只有哼著以往ｅ旋律，頭殼內一直迴seh著爸爸少年時代ｅ琴韻心聲。

(寫1996年年尾；原登di台語世界第9期1997年3月號)


後記：看著9月初一 自從爸爸8月14日離開阮了後 又另一月 心中艱苦  再以此文追思

Original Post on Pixnet