台灣諺語
吳長能寫
20090301
1.「一支草一點露」
zįt gī càu, zįt diam lō.
內容註解：
每一支草，天公伯仔每工透早攏會互伊一滴露水，有這滴露水，這支草就會凍活落來。這句話的意思是講，天公伯對每一個人攏真公平，伊乎咱大家希望，乎咱機會，咱愛珍惜天地的賞賜，m通凊采放棄機會。咱每一個人攏有路用，對社會儕少攏有貢獻，「濫濫馬嘛有一步蹋」，m通隨便就看輕家己，看輕別人。
2.「做人就併，做雞就慶。」
zòr lăng dor bìng, zòr ge dor cìng.
內容註解：
這首諺語是勸人立志向上。歸句意思是做人愛振動，愛nng鑽，總講一句就是人愛拍拼才有出脫。就親像雞仔愛拽翅撥土，cue物件食仝款，為雞母家己嘛為了雞仔囝。雖然zitma雞仔食飼料，免cue物件食。看雞仔慶土腳cue物件食的動作，對咱做人的啟示就是做代誌，做事業愛知影變竅，愛nng鑽啦。
3.「少年未曉想，食老毋成樣。」
siàu lĕn bhę hiau siūⁿ, zią lāu m̱ ziāⁿ iūⁿ.
內容註解：
少年未曉想，就是少年的時陣，放盪無zamzat，結果錢開了了，食老的時，無人cap你，老歹命。這句話是ga咱講趁咱閣少年愛認真讀冊，學習做人的道理，學習做代誌的本領，出社會了後，會趁錢袂亂開錢，知影按怎過日子，好好仔做人，對社會有交代，按呢咱食老的時陣就有好的結果，袂老歹命。
4.「倚山山崩，倚壁壁倒，倚豬椆死豬母，靠家己上蓋好。」
ua suaⁿ suaⁿ bang, ua biāh biāh dòr,
ua dī diău si dī bhòr, kòr ga gi siong gài hòr.
內容註解：
倚山山崩，想講山袂倒，會凍倚靠，結果山嘛是會崩，921大地動南投的山毋是天災地變嗎？倚壁壁倒，想講壁真結實，會凍倚靠，結果地動嘛是照常倒，世界上無啥麼會凍乎咱靠一世人，干那家己的意志才會凍倚靠，有困難的代誌發生，總是愛靠家己去面對，去處理，這是靠家己上蓋好的道理。
5.「這溪無魚，別溪釣。」
zit ke bhōr hĭ, bat ke dior.
內容註解：
這溪釣無魚，袂死心，一定veh ga 釣gah有為止。其實去別條溪釣照常釣有魚，兒女事情嘛是按呢，世間查甫人ziorkueh，查某囝仔tat倒街，毋通執迷。所以m通閣tong時間dihia憨憨仔等，憨憨仔釣。走cue終身伴侶、或者是cue頭路，做事業攏仝款，這種辦法行袂通，換一個角度想，想別種辦法，犯勢就成功啊，就會凍解決。做人就愛會曉變kiau，無會害死家己。
6.「加減趁，卡袂散；加減kiorh，卡省甲人借。」
gē giam tąn ka bhē sąn gē giam kiōrh ka sing gą lāng ziōrh
內容註解：
這首諺語是勸人開源節流。歸句意思是只要有做kangkue，有收入濟少無要緊，雖然袂好額，但是嘛卡袂散赤。真濟家庭主婦di-厝內做加工的kangkue就是加減趁。除非經濟真量尚，物件iau閣會凍使用，亦是m通擲掉換新，若是暫時用袂著，嘛m通擲掉，需要的時就用會著，免去甲人借。真濟做老母的攏會甲大漢囡仔穿的衫褲留乎細漢的弟弟妹妹穿，這就是加減kiorh的精神。
7.「好天就存雨來糧。」
hor tiⁿ dior zūn hō lāi niŭ.
內容註解：
好天的時，愛加儉寡糧食，以免落雨天無物件通好食。落雨天意思是有困難的時陣。這句話ga咱講，好天愛認真拍拼，就參像少年勇健的人愛認真拍拼，積寡錢，m通盡趁盡開，儉寡錢，veh用的時才有法度，因為多數人的一生m是攏會凍過了真好康。古早農業社會的生活卡艱難，所以叫人就卡儉，zitma時代雖然有卡進步，m閣景氣嘛是有大歹的時陣，所以這句話猶原真合用。
8.「感情留一線日後好相看。」
gam zĭng lāu zit sųaⁿ, rit āu hor siōr kųaⁿ.
內容註解：
人gah人做伙，愛珍惜，愛感恩，有緣才會鬥陣做伙，m通一時匆碰，煞來歹面相相。感情的代誌ve使化切就切，按呢不但無法度解決代誌，而且會造成心理傷害。千萬愛留一寡抽退，以後若是有機會閣和好的時，才會凍彌補轉來。無論是朋友亦是男女的交往，一但發生感情重大的摩擦，愛會記得，留一點仔線索，日後卡好處理。其實感情留一線日後好相看這句話是一種成熟的表現。
9. 田螺含水過冬
cān lĕ gām zùi guè dang.
內容註解：
田螺di熱天ziah出來lua-lua-sor，寒天的時，伊就藏di lok-go-a-muai內底，等待來年春天落雨的時陣，才閣出來活動。寒天伊就靠體內所gam有限的水份過日子。人就ga田螺gam水過冬的情形，提來做例，比喻散赤人忍耐過日子，等待好時機。這句話乎咱的啟示是人面對困難的環境，無凊采消mo元氣，顛倒骨力保持實力，一但環境改變，就有機會再出發。
11.「南蜂炮，北天燈」
lām hōng pąu, bak tēn ding..
內容註解：
元宵節台灣上出名的民俗活動，一個是南部台南鹽水放蜂炮，一個是北部台北平溪放天燈。放蜂炮的活動是感念祖先的情懷，以及對關帝君神明的敬拜，伊的意義有驅邪制煞，保平安的宗教內涵。這個風俗已經有百八冬的歷史，聽講veh參加這個盛會，愛di安全帽，歸身軀包an-an，才袂去乎蜂炮彈著。放天燈，di古早資訊交通無發達的時，是用來ga厝內的人報平安。今仔日放天燈的活動已經延伸到祈福，求平安，運途，國泰民安等活動，真濟人新正過年就來到平溪放天燈，一得到元宵節。
12.「草山風，竹仔湖雨，金包里大路」
cau suāⁿ hong dik a hō gīm bāu lì duą lō.
內容註解：
草山zitma叫做陽明山，草山有溫泉，出產硫磺，硫磺會凍做火藥。草山頂面有一個所在叫做竹仔湖。竹仔湖本來是湖，後來地形變動，湖水dui南爿出口流出，形成小盆地，zia定定落雨，雨水厚，伊的雨水是台北市的二倍濟。竹仔湖種海芋仔花出名。盤過山嶺，就會到金包里大路，這條路是台北通往金山的山路，有二百年以上的歷史，以前凱達格蘭人就定定行這條路打獵、嫁娶。這條路閣叫做魚路，討海掠魚的人，利用這條路運送魚貨，暗時九點dui金山出發，四點進前愛趕到台北大稻埕的魚行。
13.「袂食五月粽，破裘m甘放。」
bhųe zią gho ghuųe ząng, pùa hiŭ m gām bąng.
內容註解：
這首諺語的意思是講猶未食五月節粽，寒天的衫m通收起來，隨時閣穿會著；因為di五月節進前，天氣袂穩定，就親像俗語塊講的「春天後母面」，天氣有時熱有時寒，穿衫愛注意，若無細膩就會去寒著，寒著對現代人來講是一種買命的症頭，千萬就愛注意。所以這句諺語提醒咱五月節進前，寒天的衫閣用會著。
14「九月九，風吹滿天哮」
gau ghųe gàu, hōng cue mua tīⁿ hàu.
內容註解：
舊曆九月初九，九月重陽是老人節，古早人對老輩攏真尊重，每年九月初九攏特別來慶祝，尤其是秋天豐收，歸家大小團圓，囡仔sng風吹，風吹滿天攏是，這款秋天的情景是一種幸福的寫照，九月九重陽節，提醒現代社會愛尊重老人，痛惜老人，按呢不但會凍傳揚孝道，而且會凍傳承序大人的智慧。
15「台灣諺語：唐山過台灣，心肝結歸丸。」
dn̄g suaⁿ guè dāi uăn, sīm guaⁿ get gūi uăn.
內容註解：
這首諺語描述早期唐山來的祖先，冒著生命的危險，兌中國福建、廣東經過黑水溝，移民來台灣，這個過程非常艱難，所以心肝頭結歸丸。唐山來的祖先，因為中國政治腐敗，經濟困苦，聽講台灣錢淹腳目，所以冒著生命的危險，渡過烏水溝（台灣海峽）欲來台灣拍拼，追求幸福美好的日子。誰知影欲離開故鄉，未來生死不知，黑水溝會捲螺仔陣，真濟人就來失去生命。
16「十去，六死，三留，一返頭」
zāp ki, lāk sì, sāⁿ lău, zit huān tău.
內容註解：
這首諺語是描寫唐山來的祖先經過烏水溝來台灣開墾的歷史諺語。唐山來的祖先為了要追求較好的生活要到台灣來，但是要經過烏水溝，就是台灣海峽，這是要冒生命的危險，十個由唐山出來的祖先有六個會沈死海底，有四個到台灣，但是其中一個水土不合，要閣翻頭轉唐山，嘛可能會死。這句話講出咱的百越族祖先有冒險gah毋驚死的精神。
17「紅柿若上樹頭，羅漢腳仔目屎流。」
āng gī à ną ziųⁿ cių tău, lōr hàn kā à bhąk sài lău.
內容註解
什麼是羅漢腳仔？羅漢腳仔就是流浪漢。古早時代，者也（這些）流浪漢，因為無所在睏，攏歇置羅漢廟的神桌腳，所以叫因做羅漢腳仔。這首諺語描述咱的百越族祖先來到台灣，每年若到秋天，樹仔頂開始生紅柿的時陣，就知影年兜欲到啊，天氣就開始轉冷，羅漢腳仔是一個人孤孤單單，真可憐，就會特別懷念故鄉唐山的親人，想欲甲厝內的人歸家團圓，所以才會目屎流。
18.「陳林滿天下，存的乎狗咬。」
dān lĭm mua tēn hā cun e ho gàu gā.
內容註解：
這首諺語的意思是在台灣姓陳姓林滿四界，其他的姓就無hia普遍。並m是真正乎狗咬。姓陳姓林會hia濟，一般的講法有二種，第一種講法。早期唐山來台灣開墾的祖先，攏是仝庄頭的親成朋友做伙來，而且好康鬥相報，所以攏仝姓。第二種講法。早期台灣住平地的平埔族，因為漢化變做熟蕃，清朝皇帝賜姓，先封的姓陳姓林卡濟，後來生湠就卡濟，尾仔賜姓的像姓潘、姓巫就生湠卡少啊。今仔日的原住民姓漢姓嘛仝款情形。
19. 「社頭蕭一半，鹿港施了了。」
sią tău siau zit bųaⁿ, lok gàng si liau liàu.
內容註解：
這首諺語並m是di罵人的。其實伊的的意思是彰化社頭這個所在，四界攏是姓蕭的，鹿港這個所在有三分之一的人攏姓施。這有可能是當初漢人來台灣集體開墾或者gah皇帝賜姓有關係，歸庄頭攏是仝姓的親族。現代社會開放，南北二路大家拋拋走，真濟人離開親族仝姓的庄頭，到都市形成新的社區，各族群的姓攏有，就無這款的現象，m閣嘛是有真濟宗親會的組織。
20蕃薯毋驚落土爛，只求枝葉代代湠
hān zĭ m gīaⁿ lor tŏ nūa, zi giū gī hiorh dąi dāi tųaⁿ.
內容註解
蕃薯本來生di墨西哥、哥倫比亞附近的熱帶地區，隨著哥倫布去到hia，ga za轉歐洲、地球she一輾轉，di十七世紀初引進來到台灣。蕃薯雖然臭賤，生命力強，伊會定根旋藤，真qau生湠。二次戰後，台灣人無米通好食，攏嘛食蕃薯，蕃薯食gah會驚，m閣zitma蕃薯貴蔘蔘。台灣地圖的形狀親像蕃薯，有人提蕃薯來比喻台灣人毋驚艱苦，認真拍拼的精神。
21.「愛拼才會贏，無行袂出名。」（林貴龍）
ài biąⁿ ziah ę iăⁿ bhōr giăⁿ bhę cut miă.
內容註解：
天下間無白食的中晝頓，一定愛付出代價才有收成。所以做任何代誌攏愛腳踏實地，認真拍拼，才有成功的可能。真濟人干那出一支嘴，講gah嘴角全全波，根本無行動力。講道理，我想真濟人攏真ghau，見真叫伊做，無半撇，按呢太有可能行出家己的路來呢？無行袂出名啦，德國人、日本人攏是講會到，做會到袂膨風的民族，咱實在愛gah人加學習。
22「甘蔗無雙頭甜，月娘無逐日圓。」（林憲章）
gām zią bhōr siāng tāu diⁿ, ghuę niŭ bhōr dąk rit ĭⁿ.
內容註解：
這句諺語gah一般人deh講的俗語「花無百日紅，人無千日好。」仝款意思。甘蔗的甜分攏沉deh靠近根的所在。愈向頂面大的尾溜就卡無hiah甜，所以無雙頭甜。月娘嘛毋是逐工圓滾滾。俗語講「初三、四，月眉意；初七、八，月半圓；十五、六，月當圓；廿三、四，月暗暝。」這是大自然的現象，看你用啥物心情來看待。總是人的各種造化攏gah天理安排仝款，咱愛有覺悟才好。
23「穿大衣吹冷氣，游泳池飼金魚。」（林貴龍）
cing duą i cuē ling ki, iū ing dĭ ci gīm hĭ.
內容註解：
這句諺語一看就知影是討債的行為。穿or-bha這種ziah厚的衫來吹冷氣，明明是蹧躂人。若是冷氣相冷，就開卡細港，若是感覺寒，就mai吹冷氣，吹冷氣愛浪費電，浪費資源，bhe凍滾sng笑。游泳池是提供運動的所在，提來飼金魚未免用m對所在，犯勢嘛飼袂活。序大人定定ga咱講相討債，會ho雷公ham死。
24「一拖過三冬，閣等一世人。」（陳當發）
zit tua guè sāⁿ dang, gorh dàn zit sì lăng.
內容註解：
這句諺語是講一個人做代誌，拖拖徙徙，答應人偌久會做好，結果一拖就是三年，若欲ga等待，可能一世人就無法度期待。咱做人上驚答應人，既然承諾欲替人做kangkue，就愛照呼照行，毋通乎人嫌，無會去乎人怨慼一世人。其實社會若欲進步，實在做，才會受肯定。
25「無冰箱三頓鮮，有冰箱食炮麵。」（林貴龍）
bhōr bīng siuⁿ sāⁿ dǹg ciⁿ, ų bīng siuⁿ zią pàu mī.
內容註解：
這句諺語是講人di福氣當中，閣毋知福氣，顛倒蹧躂福氣。Di阿公阿媽無冰箱的時代，家家戶戶款三頓攏是逐工去菜市仔買轉來煮，食鮮的物件，現代社會進步，有冰箱，照理會凍冰真濟物件，煮食加真方便，事實顛倒反，顛倒懶西無愛煮，食泡麵卡緊。這實在是枉費冰箱的發明。現代文明到底是帶來乎人類進步，iah是退步？
26.「毋驚大箍食pizza，毋驚胃痛淋cola」（曾江山）
m̢ giāⁿ duą ko zią pi zāh, mͅ giāⁿ ūi tiąⁿ līm kò lāh.
內容註解：
pizza、cola di西洋攏是流行的糞埽食物，咱台灣人竟然ga當做寶來看待。其實台灣好食物滿四界，碗粿、肉粽、蚵仔煎、臭豆腐等等，仙食嘛袂大箍嘛袂胃痛，咱實在無需要兌人deh流行。Pizza是高澱粉、高脂肪閣高卵白質的物件，食濟當然會快肥，cola有生理人提來洗雞腸內底的胃siunn，聽講洗了閣真清氣，咱人若定定淋這種cola，胃siunn甘袂拍歹了了？
27「學校教育十年功，卡輸媒體一陣風。」（林貴龍）
hąk hāu gàu iok ząp nī gong, ka sū mūi tè zit zųn hong.
內容註解：
現代科技發達，媒體不管是電視、lariorh、報紙、雜誌，對家庭、社會的影響攏真大，學校長久的教育，有時陣就袂堪媒體的煽動，價值觀煞來扭曲。定定聽序大人講媒體教歹囡仔大細。其實媒體傳播嘛是一種社會教育，所以大家愛斟酌媒體的厲害，愛看乎真，認乎明，ziah袂誤大事。
28「情義攏是上基層，背骨多數讀冊人」（林貴龍）
zīng ghī long si siong gī zăn, buę gūt dōr so tąk cè lăng.
內容註解：
這句諺語是提醒咱讀冊人毋通做出傷天害理的代誌。讀冊人照講是讀真濟冊，識真濟道理的人，是按怎會做出反背的代誌？因為識濟，本來是愛用來服務社會，siang知影受著利益的誘拐，知識煞變做犯罪的工具，士農工商的世俗人因為知識bhat無透，就卡袂做出大歹事，莫怪人講zia-e基層的人重情義，這是相對的看法。
29「翁若才情，某著清閒。翁若了然，某著可憐。」（杜惠美）
ang ną zāi zĭng, bhò dior cīng ĭng. ang ną liau rĕn, bhò dior kor lĕn.
內容註解：
翁仔某是共同體，做翁婿的認真拍拼，事業有成就，做某的管顧家庭事項，做一個英英美代子，涼勢仔涼勢，夫妻共同享受榮華富貴。做翁婿的若是貧惰懶西，歸日哮飽閒閒，欲食毋討趁，做某的人就卡歹命，愛出外奔波，為生活走蹤，閣愛顧內，擔頭雙頭擔，有夠可憐。
30「出門看天氣，入門看人意。講話好口氣，萬事攏如意。」（杜惠美）
cut mn̆g kùaⁿ tīiⁿ ki, rip mn̆g kùaⁿ lāng i. gong uē hor kau ki, bhąn sū long rū i.
內容註解：
現代人出門攏會先看天氣預測，看天色，知影通ta衫， za雨傘雨幔，轉來厝內，就愛看人的面色，並毋是siang卡佔懸，厝內的人互動非常重要，按呢ziah會完滿，人講家和萬事成。不管di厝內或者是di社會上gah人企起，講話的口氣愛注意，若是會曉看人面色，應對就袂dingdann，自然有貴人相助。按呢對咱的事業就加卡好勢。
31「歡喜亢心頭，煩惱放水流，永遠青春攏袂老。煩惱貯心頭，規工結目頭，目屎著會管管流。」（杜惠美）
hūaⁿ hì kǹg sīm tău, huān lòr bàng zùi lău, ing uàn cīng cun long bhę lāu. huān lòr dè sīm tău, gūi gang gat bhąk tău, bhąk sài dior ę gòng gòng lău.
內容註解：
人生難免起起落落，若保持樂觀的態度來面對人生，ga歡喜的代誌亢diam心肝頭，ga煩惱放袂記，按呢就卡袂臭老，永遠嘛青春少年，這款的人生是彩色的。若是歸工ga煩惱的代誌亢diam心肝頭，閣無法度面對，無法度解決，歸工憂頭結面，干那啼哭，心肝袂清，這款的人生是烏白的。
Original Post on Pixnet