高雄庄頭藝穗節 看庄頭戲
台語戲劇專欄 GNN紹介
連續二冬 由高雄市政府文化局主辦ｅ 高雄庄頭戲， 2012年9月初9暗時 di大社國中 欣賞一齣 台語歌仔戲-- 劉瑞蓮護國， 內容是deh講後漢時代ｅ劉智遠皇帝， 生性風流 是非無分， 內政無什麼出色， 外交ma無威風， 佳哉 有東宮皇后 劉瑞蓮 武藝一流 閣有帶兵經驗， 以伊ｅ智勇雙全 解決內憂外患ｅ威脅。
久來 無看過歌仔戲， zit回臨時起意 撥工去觀賞 春美歌劇團戲ｅ 招牌演出。 Ho人 大開眼界 是 戲裝、 戲台ｅ氣勢 攏已經m是 三四十冬前ｅ格局。 難得ｅ是 臨時舞台搭gah真大。 可是台頂ｅ演員 每一個人ｅ表情 攏以真人 實比例 表現出 真生動ｅ情緒語言， 生氣、 歡喜、 膽寒、 陰奸、 戲鬧、 sai-nai[撒嬌]、 悲傷、 得意、 私下恥笑 等等 攏有針對 身份、 心情變化 做出真好ｅ詮釋， 這m是 電影、 電視頂面ｅ特寫鏡頭 用特別ｅ技術 剪接修飾過ｅ放大， 卻可看著一清二楚ｅ表情， 可講是燈光、 演員、 布局ｅ優點。
唱、 演、 念、 打 di zit齣戲真幼工， 一開場武戲ｅ部份diorh演了真濟， 其中閣有一寡武藝幼步， 真明顯di劉瑞蓮ｅ腳手功夫喬段 表達了 真siap-pah兼dau-dah [入裡深透]， 觀眾一路拍pok仔 咻叫； 西妃蘇秀英 裝飾嬌滴滴 施展女性 歸工迷皇帝ｅ魂體； 皇帝劉智遠ｅ個性 一下仔驚忠直決斷ｅ東宮、 一下仔疼命命 西妃妖美女， 個性變化兩極 加上戲齣內底ｅ笑料， 真是演出一流， 莫怪場中 身邊有一位無熟識ｅ粉絲 對我講， 伊看團長郭春美 (此部飾皇帝)ｅ戲 已經看二十冬， 反串男小生攏無老， 而且真轟動， 頂港有名聲、 下港上出名， 金牌賞足濟， 可見zit款野台戲氣味 閣有現代劇院貴氣ｅ戲齣 並無因為歌仔戲ｅ勢弱 來失去生機， 原底歌仔戲ｅ歌曲形式， 比如 七字接搖板、 緊疊仔、都馬調 等 攏透過戲齣ｅ進度， ga戲齣ｅ精華重點 表演出來， 舊架構加上新元素， 莫怪 南北粉絲 due演出 pa-pa走， di西門町 現代流行ｅ街路舞之外， 另一種後現代ｅ表演文化形式 di zit場演藝上 表現出來， 這可看著 成功總是來到有準備ｅ人身上 之說明。
觀眾並無因為是歌仔戲 全dorh 老阿公老阿婆ｅ死板印象， 真濟人看起來是少年人， 來看戲 親像參加一場嘉年華會， 台頂台腳攏真親和， 甚至有人穿sui-sui 從來無缺席過 任何zit款本土歌劇ｅ場合， 坐位外四箍圍 閣有kia deh看ｅ觀眾， 場外 有真濟 小點心擔 gah 一寡藝量品攤位。
這是一齣罕見ｅ女英雄戲， 真濟對話 攏是用台語ｅ文言音， 有寡雄雄聽無， 歌曲詞攏有di舞台雙爿邊仔小銀幕 拍出， 只是若veh有卡好ｅ效果， 上好是台詞 ma拍di銀幕頂面， 而且 口語對談 可卡現代leh， 按呢卡好達到 庶民生活ｅ 淺易交流。
文化是軟實力， 期待 台灣存在真濟 蠓仔院館ｅ同時， 加想一寡 像按呢全民活動ｅ策畫， 激勵參與 可影響著 人民ｅ積極意識， zit項 抽象ｅ動力 是會轉化做 社會能量。
一向個人無真注意ｅ南韓， 科技、 戲劇、 食品、 穿插等， 攏已經進一大步，ma進入已開發國家， 近來又 將早di15 世紀中葉年間 已建造諺文系統ｅ世宗大王， 追崇伊對國族文化貢獻， 特別設立 世宗市鎮， 以敬記一代賢士ｅ遠見， 這對文經消弱中ｅ台灣 是一個真大ｅ指標作用。
若是戲碼 閣卡注重 本土英雄事蹟， 庄頭戲 必有 觀眾自身ｅ熟識身影， 按呢ｅ根 對國民ｅ信心 必然內化di生活中。
Original Post on Pixnet