溫柔有情的旅行詩路
──序張春凰台語詩集《旅行心詩》
胡長松
成做一个台語文學運動者、教學者、散文家、詩人，張春凰新的詩集《旅行心詩》近期欲出版，已經距離伊寫第一本散文集《青春ｅ路途》將近20年矣，予人驚奇的是，詩文內面青春的氣力，並無因為時間反黃去，伊的心，續是愈來愈有活力，愈來愈溫柔，嘛愈來愈清醒。我想，這是伊對生命的體會佮對台灣母地的感情直接的表現。
《旅行心詩》講是「旅行」，實際上，是對台灣山林的「行禮」、「巡禮」開始的。張春凰成做詩人的筆，位山野、氣候、樹林直到動植物，有全面性的鋪排，而且閣毋是乾焦囥佇平面地圖彼款的紀錄，詩中有留落伊成做詩人意識的有情觀照，嘛時常出現伊佇歷史的小路出入行踏的跤跡，確實是值得咱款款仔品讀的溫柔「心詩」。
講起心詩的有情觀照，我真佮意伊所寫的〈大雨〉中的詩句，描寫的是一群老同窗旅行途中的大雨：
車窗糊一面水廉
薄紗內外
互相看ve清ｅ面貌
只有真實沈底ｅ同窗情誼
添加心內ｅ感動
愈遠愈深
按呢的詩句，描寫大雨中車窗的景緻，描寫同窗的情誼，嘛同時描寫詩人本身的心情，這款多層次的描寫佇詩句疊貼做伙，就是即款「心詩」的眉角，嘛是將眼中風景「詩化」（或者講是「文學化」）的基礎。透過即個詩化的過程，風景不再是水tsiann2的風景，轉化做有詩人意識存在當中的有鹽份的藝術，閣親像即首描寫東北海岸的水佮石的〈依戀〉:
海水潑來 石e腳底
輕聲細語
勻勻仔ga搭貼
海水爬附 石ｅ半身
吟調唱歌
柔柔仔ga攬腰
海水攀纏 石e耳際
款款仔ga獻心詩
海水流洗 石e頭面
深情深意m甘離
看會出來，張春凰的作品是屬佇春天浪漫的詩質。詩裡時常是溫暖、歡喜、輕鬆的色水，這展現的，是詩人佮風景之間的「親密」：因為「親密」，就袂共風景看做普通；因為「親密」，嘛袂共石頭當做無生命的焦燥的物件；因為「親密」，嘛給咱佮風景之間的疏離感縫補起來。確實，佇人佮環境分裂甲這呢嚴重的現代工業社會，咱需要這款有心的詩，來回復咱佮環境的關係。另外，這本詩集內面，有幾首詩是詩人的心佮歷史風景的互動，比如講下面即首：
綠島組曲之五 目屎池
一堵刻烙囚禁者名字ｅ石壁
親像越戰紀念碑ｅ勇士
白骨一堆
無可回頭
來述說稀微ｅ流年
短月長年
吞辱忍冤
暗茫無盡ｅ哀思
親像岸邊ｅ海湧
無停止ｅ吞蝕抽絲
一直到
愛ｅ目屎 淨化了怨恨ｅ苦海
一直到
愛ｅ目屎 珍惜了受難ｅ卑微
位詩的風景tshua咱進入歷史的觀照：因為有心，目睭前的風景成做有歷史意識的風景；因為有情，風景嘛成做有情味的詩。詩一首過一首讀落去，就親像咱一步行過一步的旅行。這一系列的旅行，位山林行入夜都市，佇〈銀樓珠寶街〉出現按呢的批判的風景：
世人只愛鑽石e高貴
超級e財寶物
ve記得gor著qin-a e血gah目屎
流血留滴e烏市gah虛華ham罪惡e非洲e內戰
即首詩值得咱注意的，是風景中「陰影」的書寫，將鑽石的高貴佮伊背後的罪惡牽連對比，詩人真有把握的能力：
行過銀樓珠寶街
一陣一陣ui遙遠ｅ烏色世界殘酷ｅ相殺陰氣
通過歸身軀 起一陣一陣e加冷sun
鑽石商ga引進來台灣
為著用血洗過e超級錢寶物
銀樓珠寶街e店頭 加上一牌告示：
“本店裝備保全系統連線監視控中”
自按呢了後
冤親債主糾纏due 絆
無了時
毋過，按呢的物件佇這本詩集內面算是佔較少數的，講起來，可能嘛是春天的氣質對題材自然選擇的結果。
即本「心詩」「旅行」的後半段，位山林都市，行入詩人人生旅行的體會。我上佮意〈壁角ｅ舊腳桶〉，詩人按呢描寫伊佮老母的感情：
壁角hit個鉛做e舊腳桶
桶沿
若阿母你ga我做e
hit 領有滾邊 捏ging荷花裙
iau有hit塊ce衫ｅ cing仔
塑膠e鬃毛 減一半
若阿母你e
hit支lu假嘴齒ｅ齒抿仔
你拒絕新衫
講：
“ gorh食無外久
舊衫穿穿leh dor有夠a
mtang浪費”
iau有hit塊
表面nua gah金金、滑滑
邊仔suah ki角
你用來家己洗衫e
老cuah板仔
恬恬陪你勇健e
歲月流金
詩的表面平實白描，毋過詩裡的形象遐呢親切，閣遐呢真實突出，透過生活中細項物仔的對比，將母仔子互動的感情款款仔鋪排出來，規首詩感動人的所在是觀察的幼路、飽紮，窮實講，這嘛是咱理解張春凰詩藝的基礎：伊的詩，的確就是溫柔感情的直接表現。這款溫柔的感情正是伊過去所寫的散文的本質，是伊一直做運動的氣力來源，嘛是即本詩集的一切內涵，位外表的世界達到內心上燒lo的所在。
戰後的台語詩運動發展到tann，除了已經出名的詩人，嘛有濟濟佇台語文相關推展教育班、讀冊會等團體裡底開始寫台語詩的「詩眾」，每一年的詩作發表愈來愈濟，算是一個好現象；毋過，位另外一方面來看，平時會讀詩的民眾敢有增加？這是台語詩發展的另外一個挑戰。按怎兼顧大眾性佮藝術性，予愈濟人讀有好詩，甚至透過詩，佮讀者的生活、生命有牽挽？我想這嘛是張春凰佇這本詩集想欲行出來的路──用伊特別的抒情的書寫，行入空間佮時間的旅行。
張春凰的詩透過旅行行入風景，嘛透過風景行入咱的心，成做咱的旅行。所以，所有欲走揣春天的讀者，請趕緊來讀張春凰的詩，你就會行入這紲有百款面容的春天旅行。
2008/12/16 佇高雄內惟
Original Post on Pixnet